মিজোৰাম ফুটবল এছ’চিয়েশ্যনৰ উদ্যোগত অহা ৬ ছেপ্তেম্বৰৰ পৰা আইজলৰ আছাম ৰাইফলছৰ খেলপথাৰত শুভাৰম্ভণি হ’ব বহু প্ৰতিক্ষিত ‘মিজোৰাম প্ৰিমিয়াৰ লীগ’ ফুটবল টুৰ্ণামেণ্ট। বুধবাৰে মিজোৰাম ফুটবল এছ’চিয়েশ্যনৰ বিষয়-ববীয়াই এই কথা ৰাজহুৱা কৰে।
আনহাতে এছ’চিয়েশ্যনে জানিবলৈ দিয়া অনুসৰি অহা শুকুৰবাৰে আইজলস্থিত চানমাৰী ৱাই এম এ হলত আনুষ্ঠানিকভাৱে মিজোৰাম প্ৰিমিয়াৰ লীগৰ সপ্তম সংস্কৰণৰ শুভাৰম্ভণি কৰিব।
মিজোৰামৰ ফুটবলাৰ তথা দৰ্শকৰ বাবে বহু প্ৰতিক্ষিত ফুটবল টুৰ্ণামেণ্টখনত চলিত বছৰত আঠটা দলে শ্ৰেষ্ঠত্ব অৰ্জনৰ বাবে যুঁজ দিব বুলি এছ’চিয়েশ্যনে জানিবলৈ দিয়ে।
অংশগ্ৰহণ কৰিবলগীয়া দল কেইটা হ’ল আইজল এফ চি, বেথলেহম ভেংথলাং এফ চি, চানমাৰী এফ চি, চ’নপুই এফ চি, চিংগা ভেং এফ চি, ইলেকট্ৰিক ভেং এফ চি, মিজোৰাম পুলিছ আৰু ৰামলান নৰ্থ এফ চি।
প্ৰতিযোগিতাখন সন্দৰ্ভত জানিব পৰা মতে প্ৰত্যেকটো দলে বিপক্ষৰ লগত দুবাৰকৈ মুখামুখি হ’ব আৰু লীগৰ শীৰ্ষ চাৰিটা দলে প্ৰতিযোগিতাৰ ছেমি ফাইনেললৈ অগ্ৰসৰ হ’ব।
আনহাতে প্ৰতিযোগিতাৰ চূড়ান্ত খেলখন অহা ৭ ডিচেম্বৰত অনুষ্ঠিত হ’ব বুলি আয়োজক গোষ্ঠীয়ে জানিবলৈ দিয়ে। আছাম ৰাইফলছৰ খেলপথাৰতে অনুষ্ঠিত হ’বলগীয়া প্ৰতিযোগিতাৰ প্ৰায় সংখ্যক মেচ দুপৰীয়া ২ আৰু সন্ধিয়া ৭ বজাৰ পৰা অনুষ্ঠিত হ’ব।
আয়োজকে জানিবলৈ দিয়া অনুসৰি ৰাউণ্ড পৰ্যায়ত টিকটৰ হাৰ ৩০, ছেমি ফাইনেলত ৫০ আৰু ফাইনেলত ১০০ টকা ধাৰ্য কৰা হৈছে। আনহাতে স্কুলীয়া ছাত্ৰ-ছাত্ৰী আৰু বৰ্ষীয়ান লোকে বিনামূলীয়াকৈ মেচসমূহ উপভোগ কৰিব পাৰিব।
