‘’সমগ্ৰ অসমৰ জনসাধাৰণ তথা জাতীয় দল-সংগঠনেও যদি এই বিধেয়কখনৰ সমৰ্থন জনায়, তথাপি মই অকলেই বিৰোধিতা কৰি যাম। অসমৰ মানুহ, মোৰ বিবেক আৰু জাতীয় চেতনাই যেতিয়া ক’ব তই নালাগে থাকিব এইখন পৃথিৱীত, তই আত্মহত্যা কৰ, মই তেনে কৰিবলৈও প্ৰস্তুত।‘’
আজি দিচপুৰ প্ৰেছ ক্লাৱত দিচপুৰ সমষ্টিৰ বিধায়ক অতুল বৰাই স্ব-ৰচিত ‘’আৰ এছ এছৰ নেতা শংকৰ দাসৰ বিস্ফোৰণ, আই এম ডি টিতকৈও ভয়াবহ এন আৰ চি, তাতোকৈয়ো ভয়াবহ কি?’’ শীৰ্ষক পুস্তিকাখন উন্মোচন কৰি সংবাদমাধ্যমৰ আগত এই মন্তব্য কৰে।
তেওঁ লগতে কয়, ‘’বিধেয়কখন গৃহীত হ’লে অসমৰ মানুহে বিবেক তথা জাতীয় চেতনাই মোক নিশ্চয় আত্মহত্যা কৰিবলৈ ক’ব।‘’
উল্লেখ্য যে, নাগৰিকত্ব সংশোধনী বিধেয়কৰ ক্ষেত্ৰত বিজেপি দলৰ স্থিতি সপক্ষে যদিও সম্পূৰ্ণ বিপৰীত স্থিতি গ্ৰহণ কৰিছে শাসকীয় দলৰে জ্যেষ্ঠ বিধায়কগৰাকীয়ে। নাগৰিকত্ব সংশোধনী বিধেয়কৰ প্ৰস্তাৱ গ্ৰহণৰ সময়ৰে পৰা বিধায়ক বৰাই বিধেয়কখনৰ বিৰোধিতা কৰি কেইমাহমান পূৰ্বে মুখ্য মন্ত্ৰী সৰ্বানন্দ সোণোৱাললৈ পত্ৰও প্ৰেৰণ কৰিছিল।
আনহাতে, ‘’মই ভাৰতীয় জনতা পাৰ্টীৰ বিধায়ক হ’লেও জাতিধ্বংসী এনে এখন বিধেয়ক মানি ল’ব নোৱাৰো’‘ বুলি দাবী কৰে বিধায়কগৰাকীয়ে।
ইয়াৰোপৰি তেওঁ বিজেপিৰ বিধায়ক হ’লেও অসমীয়া জাতিক জলাঞ্জলি দিব বিচৰা বিধেয়ক কেতিয়াও গৃহীত হ’বলৈ দিয়া নহ’ব বুলি মন্তব্য কৰাৰ লগতে কয়, ‘’দিল্লীত এই বিধেয়কখন নাকচ কৰিবলৈ বাধ্য কৰাব লাগিব। কেন্দ্ৰীয় চৰকাৰ আৰু ৰাজ্য চৰকাৰক আহ্বান জনাইছো যাতে নাগৰিকত্ব সংশোধনী বিধেয়ক কোনো কাৰণতে গৃহীত হ’ব নোৱাৰে।‘’
আনহাতে, ‘’নিৰ্য্যাতিত শব্দটো মিনিংলেচ, বাংলাদেশত কোনো হিন্দু নিৰ্য্যাতিত হোৱা নাই’’ বুলি দাবী কৰি তেওঁ লগতে কয়, ‘’বাংলাদেশৰ নৱপ্ৰজন্মই ধৰ্ম নিৰপেক্ষতাৰ কাৰণে সংগ্ৰাম কৰি আছে। কিন্তু ভাৰতবৰ্ষত প্ৰচাৰ চলোৱা হৈছে হিন্দুসকল বাংলাদেশত নিৰ্য্যাতিত হৈ আছে। বাংলাদেশত অসমতকৈও ভালকৈহে দুৰ্গাপুজা হয়। তাত ২০-৩০ হাজাৰ পুজা মণ্ডপ থাকে।‘’
তেওঁ লগতে প্ৰধান মন্ত্ৰী নৰেন্দ্ৰ মোদীয়ে কেইদিনমান পূৰ্বে কোৱা ‘’কোনো ভাৰতীয়ই দেশ এৰিব নালাগে’’ উক্ত কথাষাৰৰ বিৰোধিতা কৰি কয় যে প্ৰধান মন্ত্ৰীয়ে ক’ব লাগে বিদেশী চিনাক্ত কৰি তেওঁলোকক ভাৰতৰ পৰা বাহিৰ কৰি দিব লাগে।
নামত ৰাষ্ট্ৰীয়তাবাদী দলৰ বিধায়ক হ’লেও কাৰ্য্যতঃ জাতীয়তাবাদী ভাবধাৰাৰে উদ্বুদ্ধ নেতা অতুল বৰাই সংবাদ মাধ্যমৰ আগত কয়, ‘’অসম আৰু অসমীয়াৰ স্বাৰ্থ মোৰ বাবে প্ৰথম। মই অসমৰ স্বাৰ্থ জলাঞ্জলি দি ৰাজনীতি কৰিবলৈ অহা নাই। অসম তথা ভাৰতত হিন্দু বাংলাদেশী কিহৰ বাবে প্ৰয়োজন?’’
