Mobile data services suspended for 5 days in Manipur ছাত্ৰ নেতাৰ মুক্তিৰ দাবীত শনিবাৰে মণিপুৰৰ অল ট্ৰাইবেল ষ্টুডেণ্টছ ইউনিয়নে উলিওৱা এক প্ৰতিবাদী সমদলকলৈ পৰিস্থিতি উত্তাল হৈ পৰে। ছাত্ৰ-আৰক্ষীৰ সংঘৰ্ষত কমেও ৩০ জন শিক্ষাৰ্থী আহত হয়। এই ঘটনাত দুজন আৰক্ষীৰ লোকো আহত হয়।
পাৰ্বত্য অঞ্চল সমিতিৰ প্ৰস্তাৱিত স্বায়ত্তশাসিত জিলা পৰিষদ সংশোধনী বিধেয়ক উত্থাপন কৰাত ব্যৰ্থ হোৱাৰ বিৰুদ্ধে অল ট্ৰাইবেল ষ্টুডেণ্টছ ইউনিয়নৰ নেতাসকলে ৰাজ্য চৰকাৰৰ বিৰুদ্ধে প্ৰ তিবাদ সাৱ্যস্ত কৰে।
মণিপুৰৰ পাৰ্বত্য জিলাসমূহত সম্পূৰ্ণ বন্ধ কৰি দিয়াৰ অভিযোগত আৰক্ষীয়ে তেওঁলোকক গ্ৰেপ্তাৰ কৰিছিল। তেওঁলোকৰ মুক্তিৰ দাবীতে শনিবাৰে প্ৰতিবাদ হোৱা বুলি কোৱা হৈছে।
আৰক্ষীৰ সূত্ৰই কয় যে প্ৰতিবাদকাৰীসকলক ছত্ৰভঙ্গ দিয়াবলৈ লাঠিচালনা কৰা হৈছিল। আৰক্ষীৰ ওপৰত শিলগুটি নিক্ষেপ কৰাত কেইবাজনো আৰক্ষী আহত হয়। আৰক্ষীয়ে তেতিয়া উত্তেজিত ছাত্ৰ-ছাত্ৰীসকলক ছত্ৰভংগ দিয়াবলৈ কন্দুৱা গেছৰ ব্যৱহাৰ কৰে।
এই সন্দৰ্ভত অল কলেজ ট্ৰাইবেল ষ্টুডেণ্টছ ইউনিয়নৰ নেতা নিংজান জাজোৱে কয়, “আমি আমাৰ নেতাসকলৰ মুক্তিৰ দাবীত এক শান্তিপূৰ্ণ প্ৰতিবাদত অংশ গ্ৰহণ কৰিছিলো। আৰক্ষীয়ে কোনো প্ৰৰোচনা অবিহনে ছাত্ৰ-ছাত্ৰীসকলৰ ওপৰত লাঠী চালনা কৰে। আমি আৰক্ষীৰ এই কাণ্ডক তীব্ৰ গৰিহণা দিছো। গ্ৰেপ্তাৰ কৰা আমাৰ নেতাসকলক মুকলি নকৰালৈকে আমি আমাৰ আন্দোলন অব্যাহত ৰাখিম।”
ইপিনে, শনিবাৰে ইম্ফল পশ্চিমৰ মুখ্য ন্যায়িক দণ্ডাধীশে গ্ৰেপ্তাৰ কৰা অল ট্ৰাইবেল ষ্টুডেণ্টছ ইউনিয়নৰ ছাত্ৰ নেতাসকলক ১৫ দিনৰ ন্যায়িক জিম্মাত ৰখাৰ নিৰ্দেশ দিয়ে। বিষ্ণুপুৰৰ জিলা দণ্ডাধীশে বিষ্ণুপুৰ আৰু চুড়াচান্দপুৰত দুমাহৰ বাবে ১৪৪ ধাৰা জাৰি কৰিছে। সেইদৰে, সমগ্ৰ মণিপুৰত ৫ দিনৰ বাবে ইণ্টাৰনেট সেৱাও বন্ধ ৰখা হৈছে।
লগতে পঢ়ক: Iran Bans Women: বিজ্ঞাপনত মহিলাৰ উপস্থিতিৰ ওপৰত নিষেধাজ্ঞা আৰোপ ইৰানৰ
আৰক্ষী সূত্ৰই জানিবলৈ দিয়া মতে গ্ৰেপ্তাৰ হোৱা ছাত্ৰ নেতাসকলৰ মুক্তিৰ দাবীত প্ৰতিবাদকাৰী ছাত্ৰ-ছাত্ৰীসকলে কেইবাখনো বাহনত অগ্নিসংযোগ কৰে।
