ৰাইজৰ এক দীৰ্ঘদিনিয়া সমস্যাৰ অন্ত পেলাই আজি বিশ্বনাথ চাৰিআলি নগৰৰ ৬ নং ৱাৰ্ডত অৱস্থিত ৰাজহুৱা শ্মশানত ভ্ৰাম্যমান পানীযোগান প্ৰকল্পৰ উদ্বোধন কৰে পৌৰপতি ৰুলী শৰ্মাই।
কোনো ধৰনৰ ৰাজসাহায্য অবিহনে লক্ষাধিক টকা ব্যয় সাপেক্ষে সম্পূৰ্ন কৰা এই প্ৰকল্পৰ সমুদায় খৰছ বহন কৰিছে বিশিষ্ট সমাজকৰ্মী তথা প্ৰতিষ্ঠিত উদ্যোগী নৰেন শৰ্মাই।
এই উপলক্ষে আজি আয়োজন কৰা এক গাম্ভীৰ্যপুৰ্ন অনুষ্ঠানত বিশ্বনাথ চাৰিআলি পৌৰসভাৰ ফালৰ পৰা প্ৰকল্পটোৰ দাতা গৰাকিক সম্বৰ্ধনা জ্ঞাপন কৰা হয়। সম্বৰ্ধনা গ্ৰহণ কৰি নৰেন শৰ্মাই কয় যে দুভৰিত শক্তি থকালৈকে তেওঁ সমাজৰ উন্নয়নৰ হকে যথাসাধ্য সেৱা আগবঢ়াই যাব। তদুপৰি নৱ-প্ৰজন্মক সময় অপচয় নকৰি তেওঁ কঠোৰ পৰিশ্ৰম কৰিবলৈ অহ্বান জনায়।
পৌৰপতি ৰুলী শৰ্মাই পৌৰসভাৰ অধীনস্থ ৰাজহুৱা শ্মশানখনৰ দীৰ্ঘদিনিয়া অভাৱ দূৰ কৰাৰ বাবে শৰ্মাক কৃতজ্ঞতা জনোৱাৰ লগতে তেওঁৰ দৰে প্ৰচাৰ বিমুখ, কঠোৰ পৰিশ্ৰমী আৰু উদাৰ ব্যক্তি সমাজৰ বাবে আদৰ্শ স্বৰূপ বুলি উল্লেখ কৰে।
পৌৰসভাৰ কৰ্মচাৰী ভাস্কৰ জ্যোতি বৰাই আঁত ধৰা অনুষ্ঠানটোত ৱাৰ্ড কমিচনাৰ ৰীতা মহন্ত, ৰুপক দাস গুপ্ত, বিমান শইকীয়া, মাধৱী সৰকাৰ, আচমা চুলতানা, তাপসী চাহা, জ্যেষ্ঠ কৰ্মচাৰি প্ৰদিপ শইকীয়া, ৰাতুল শৰ্মা, পবিত্ৰ বৰুৱা, ভুপেন কলিতা প্ৰমুখ্যে পৌৰ কৰ্মচাৰী সকলৰ উপৰিও কাৰ্যবাহী বিষয়া প্ৰাঞ্জল দাসকে ধৰি কেইবাগৰাকী ব্যক্তি উপস্থিত থাকে।
