প্ৰধান মন্ত্ৰী নৰেন্দ্ৰ মোদীয়ে বৃহস্পতিবাৰে ক’ৰ’না ভাইৰাছৰ বাবে ভূটানত হ’ব পৰা স্বাস্থ্য আৰু অৰ্থনৈতিক ক্ষতি হ্ৰাস কৰাৰ ক্ষেত্ৰত সকলো প্ৰকাৰৰ সহযোগিতা আগবঢ়াব বুলি ভূটানৰ প্ৰধান মন্ত্ৰীক আশ্বাস দিয়ে।
দুয়োখন দেশৰ প্ৰধান মন্ত্ৰীয়ে কোভিদ-১৯ৰ সংক্ৰমণ ৰোধ কৰাৰ বাবে দেশ দুখনে গ্ৰহণ কৰা ব্যৱস্থা সন্দৰ্ভত আলোচনা কৰি আহিছে বুলি ভাৰত চৰকাৰৰ তৰফৰ পৰা উল্লেখ কৰে।
প্ৰধান মন্ত্ৰী নৰেন্দ্ৰ মোদীয়ে ভূটানৰ ৰজা আৰু প্ৰধান মন্ত্ৰীয়ে দেশখনত কোভিদ-১৯ৰ সংক্ৰমণ ৰোধ কৰাৰ বাবে ভূটানে গ্ৰহণ কৰা পদক্ষেপক প্ৰশংসা কৰে।
আনহাতে, প্ৰধান মন্ত্ৰী নৰেন্দ্ৰ মোদীয়ে ভূটানত কোভিদ-১৯-ৰ সংক্ৰমণৰ বাবে হ’ব পৰা অৰ্থনৈতিক ক্ষতি আৰু স্বাস্থ্যক্ষেত্ৰলৈ আহিব পৰা সকলো প্ৰত্যাহ্বানত সহযোগিতা আগবঢ়োৱাৰো আশ্বাস দিয়ে।
ভূটানৰ প্ৰধান মন্ত্ৰীয়ে কোভিদ-১৯-ৰ সংক্ৰমণ ৰোধ কৰাৰ ক্ষেত্ৰত ছাৰ্ক ৰাষ্ট্ৰত ভাৰতে গ্ৰহণ কৰা নেতৃত্বকো প্ৰশংসা কৰে।
উল্লেখযোগ্য যে, ভাৰতত বৰ্তমান ১২,০০০ অধিক লোক ক’ৰ’নাত আক্ৰান্ত হোৱাৰ বিপৰীতে ভূটানত বৰ্তমানলৈ মাত্ৰ পাঁচ গৰাকী লোক ক’ৰ’না ভাইৰাছত আক্ৰান্ত হৈছে।
৩ এপ্ৰিলৰ পাছত বৰ্তমানলৈ ভূটানত কোনো লোক ক’ৰ’নাত আক্ৰান্ত হোৱা নায়।
