অসম চৰকাৰে দেশৰ কেইখনমান মহানগৰত নতুনকৈ অসম ভৱন স্থাপন কৰাৰ সিদ্ধান্ত লৈছে। বিশেষকৈ শিক্ষাৰ্থী আৰু ৰোগীৰ প্ৰতি লক্ষ্য ৰাখি ইয়াৰে এটা নতুন অসম ভৱন স্থাপন কৰা হ’ব।
বহু শিক্ষাৰ্থীয়ে অধ্যয়নৰ উদ্দেশ্যে নতুন দিল্লীলৈ যায়। সেইদৰে উন্নত চিকিৎসাৰ বাবে বহু ৰোগীও নতুন দিল্লীলৈ যায়।নতুন দিল্লীত এটা অসম ভৱন আছে যদিও বাসস্থানৰ সীমিত সুবিধাৰ বাবে শিক্ষাৰ্থী আৰু ৰোগীসকলে অপেক্ষা কৰিবলগীয়া হয়। সেয়ে অসম চৰকাৰে কেৱল শিক্ষাৰ্থী আৰু ৰোগীৰ বাবে নতুন দিল্লীৰ দ্বাৰকাত এক অসম ভৱন স্থাপনৰ সিদ্ধান্ত লয়।
মুখ্যমন্ত্ৰীয়ে ইতিমধ্যে সাধাৰণ প্ৰশাসন বিভাগ(GAD)ক এই প্ৰক্ৰিয়া আৰম্ভ কৰিবলৈ নিৰ্দেশ দিছে।GAD-এ নিবিদাৰ বাবে ৰাজ্যিক পিডব্লিউডিৰ ওচৰত বিষয়টো উত্থাপন কৰিছে।
ৰাজ্য চৰকাৰে হায়দৰাবাদতো এটা অসম ভৱন স্থাপন কৰাৰ সিদ্ধান্ত লৈছে। ইতিমধ্যে তেলেংগানা চৰকাৰৰ ওচৰত অসম চৰকাৰে প্ৰস্তাৱিত অসম সদনৰ বাবে ভূমি আৱণ্টনৰ বিষয়টো উত্থাপন কৰিছে।
তদুপৰি কলকাতাৰ ৰাচেল ষ্ট্ৰীটত থকা পুৰণি অসম গৃহ ভৱনৰ ঠাইত অধিক বাসস্থানৰ সুবিধা থকা নতুন ভৱন নিৰ্মাণৰ ব্যৱস্থা কৰা হৈছে। কলকাতাৰ চল্ট লেকত আন এটা অসম ভৱন আছে।
সংবাদ মাধ্যমৰ সৈতে বাৰ্তালাপ কৰি GADৰ আয়ুক্ত-সচিব এম এছ মণিভান্ননে কয়, “অসমৰ মুখ্যমন্ত্ৰীয়ে ইতিমধ্যে আমাক প্ৰক্ৰিয়াটো আৰম্ভ কৰিবলৈ নিৰ্দেশ দিছে। আমি বিষয়টো নিবিদাৰ বাবে পিডব্লিউডি আৰু সংশ্লিষ্ট অন্যান্য কৰ্তৃপক্ষৰ ওচৰত উপস্থাপন কৰিছো।”
