অৱশেষত স্বস্তিৰ নিশ্বাস পেলাইছে মহানগৰীত আৱদ্ধ হৈ থকা অসমৰ বিভিন্ন স্থানৰ সহস্ৰাধিক লোকে।
চৰকাৰী বাছেৰে বিনামূলীয়াকৈ ঘৰমুৱা হৈছে বহুসংখ্যক লোক। ইয়াৰ লগতে আজিৰ দিনটোত চৰকাৰী বাহনেৰে ঘৰলৈ যাবলৈ সাজু হৈছে আৱদ্ধ হৈ থকা সহস্ৰাধিক লোক।
উল্লেখযোগ্য যে, গুৱাহাটীত আৱদ্ধ হৈ থকা সহস্ৰাধিক লোকক শনিবাৰ, দেওবাৰ আৰু সোমবাৰে চৰকাৰী বাছেৰে বিনামূলীয়াকৈ বিভিন্ন জিলাৰ বাসগৃহ অভিমুখে প্ৰেৰণৰ ব্যৱস্থা কৰা হৈছে।
প্ৰথম দিনটোত গুৱাহাটীৰ পৰা যাবলগীয়া লোকসকলৰ বাবে নিৰ্ধাৰিত কৰা ৪ টা স্থান- পল্টনবজাৰ বাছ আস্থান, মাছখোৱা, আই এছ বি টি আৰু আদাবাৰীৰ নিৰ্দিষ্ট স্থানত উপস্থিত হৈছেগৈ আজিৰ টিকট লাভ কৰা যাত্ৰীসকল।
পল্টনবজাৰৰ অসম ৰাজ্যিক পৰিবহণ নিগমৰ বিষয়া এগৰাকীয়ে নৰ্থ ইষ্ট নাওক জনোৱা অনুসৰি যাত্ৰীসকলক নিজৰ ঘৰলৈ লৈ যোৱা এই বাছসমূহ প্ৰথমে বিভিন্ন আৰক্ষী থানা আৰু আৰক্ষী চকীসমূহলৈ যাব। তাৰ পৰা যাত্ৰীসকল নিজে নিজে গৃহভিমুখে যাব লাগিব।
আজিৰ দিনটোত গুৱাহাটীৰ পল্টন বজাৰৰ পৰা ২৬ খন বাছেৰে বৰপেটা আৰু ১ খন বাছেৰে গোৱালপাৰা অভিমুখে যাত্ৰী লৈ ৰাওনা হ’ব বুলি তেওঁ জনায়।
ঠিক সেইদৰে আদাবাৰী বাছ আস্থানৰ পৰা মুঠ ৪২৫ গৰাকী যাত্ৰী নগাঁও আৰু তেজপুৰ অভিমুখে যাবলৈ সাজু হৈ আছে।
আদাবাৰীৰ পৰা দুয়োটা স্থানলৈ যাব ২৫ খন ASTC বাছ।
ঠিক তেনেদৰে ISBTৰ পৰা শিৱসাগৰ, ডিব্ৰুগড়, ধুবুৰী কে ধৰি দুৰণিবতীয়া জিলালৈ লোকসকলক নিয়াৰ ব্যৱস্থা কৰিছে। সেই পইন্টতো ২০-২৫ খন বাছ যাত্ৰীৰ বাবে সাজু হৈ আছে।
গুৱাহাটীৰ বিভিন্ন অঞ্চলৰ পৰা নিৰ্ধাৰিত পইন্টলৈ এ এছ টি চিৰ ৩০ খন চিটি বাছৰ লগতে প্ৰয়োজন সাপেক্ষে যাত্ৰীয়ে বু’ক কৰিৰ পৰাকৈ ১০০ খন উবেৰৰ ব্যৱস্থাও কৰা হৈছে বুলি জানিব পৰা গৈছে ।
সামাজিক দূৰত্বৰ কথা লক্ষ্য ৰাখি এখন বাছত ১৬ গৰাকী যাত্ৰীকহে পঠিওৱাৰ ব্যৱস্থা কৰা হৈছে। লগতে চাৰিওতা স্থানত যাত্ৰীসকলৰ স্বাস্থ্য পৰীক্ষা কৰোৱাৰ ব্যৱস্থা কৰা হৈছে।
প্ৰায় দেৰমাহ সময় লকডাউনৰ ফলত গুৱাহাটীত আবদ্ধ হৈ থকাৰ বাবে বহু বিপদৰ সন্মুখীন হৈছে লোকসকল। আজি নিজ বাসগৃহলৈ যাবলৈ সুবিধা লাভ কৰাত আনন্দিত হৈ পৰিছে যাত্ৰীসকল।
ইপিনে, ব্যক্তিগত বাহন থকা ১২,২০৬ জন ব্যক্তি ইতিমধ্যে শনিবাৰৰ দিনটোত গৃহাভিমুখে ৰাওনা হোৱাৰ বাবে জিলা উপায়ুক্তৰ পৰা অনুমতি লাভ কৰিছে। তদুপৰি ২৬ আৰু ২৭ এপ্ৰিলত যাব পৰাকৈ ১৯ হাজাৰ লোকলৈ এনে পাছ প্ৰেৰণৰ প্ৰক্ৰিয়া চলি আছে বুলি মন্ত্ৰী হিমন্ত বিশ্ব শৰ্মাই জানিবলৈ দিয়ে।
মহানগৰীত ১০০০ গৰাকী ব্যক্তিগত বাহন থকা লোকক অনুজ্ঞা পত্ৰ প্ৰদান কৰিছে কামৰূপ মহানগৰ জিলা উপায়ুক্তই। ১২০০ লোকৰ আবেদন বাতিল কৰা হৈছে।
