Raijor Dal: পঞ্চায়ত নিৰ্বাচনৰ বাবে ককাঁলত টঙালি বান্ধিলে ৰাইজৰ দলে; শিৱসাগৰত বৃহৎ যোগদান সমাৰোহ
শিৱসাগৰত আজি ৰাইজৰ দলৰ এক বৃহৎ যোগদান সমাৰোহ অনুষ্ঠিত হয়। ৰাইজৰ দলৰ সভাপতি অখিল গগৈৰ উপস্থিতিত এই বৃহৎ যোগদান কাৰ্যসূচী। শিৱসাগৰৰ যুৱদলত প্ৰায় পাঁচ শতাধিকে ৰাইজৰ দলত যোগদান কৰে।
এতিয়া প্ৰশ্ন হৈছে শিৱসাগৰত ভেটি উচন হব নেকি কংগ্ৰেছ-বিজেপিৰ? ৰাইজৰ দলৰ আজিৰ এই বৃহৎ যোগদানে তাৰেই ইংগিত দিলে নেকি শিৱসাগৰত!
১০৮ নং শিৱসাগৰ সমষ্টিৰ ১৮ খন পঞ্চায়তৰ আজি ৰাইজৰ দলত যোগদান কৰা প্ৰায় পাঁচ শতাধিকৰ ভিতৰত সৰহ সংখ্যকেই কংগ্ৰেছ আৰু বিজেপি দলৰ সদস্য।
ইপিনে, ৰাইজৰ দলত থাকি সততাৰে কাম কৰি যাবলৈ নতুন সদস্যক আহ্বান জনায় অখিল গগৈয়ে। লগতে অখিল গগৈয়ে এই যোগদান সমাৰোহত স্পষ্টভাৱে সকলোকে কয় যে ৰাইজৰ দলত আন ৰাজনৈতিক দলৰ দৰে লবী কেন্দ্ৰীক ৰাজনীতি নচলিব। অসমত এতিয়া বিজেপিৰ বিকল্প ৰাইজৰ দল বুলিও মন্তব্য কৰে অখিল গগৈয়ে।
হিমন্ত বিশ্ব শৰ্মা নেতৃত্বধীন বিজেপি চৰকাৰক আগন্তুক সময়ত শিপাৰে সৈতে উভালি ব্ৰহ্মপুত্ৰত দলিয়াই দিব বুলি কব পৰা একমাত্ৰ আঞ্চলিক দলটোৱেই ৰাইজৰ দল বুলি কয় বিধায়ক অখিল গগৈয়ে।
ৰাইজৰ দলৰ শিৱসাগৰ জিলাৰ সভাপতি মুনীন্দ্ৰ লাহনে সভাপতিত্ব কৰা উক্ত যোগদান কাৰ্যসূচীত ৰাইজৰ দলৰ কেন্দ্ৰীয় উপ সভাপতি বেদান্ত লস্কৰ, কাৰ্যকৰী সভাপতি কবীন্দ্ৰ চেতিয়া ফুকন, কেন্দ্ৰীয় সম্পাদক ধৈৰ্য কোঁৱৰ, কেন্দ্ৰীয় উপ সভাপতি ৰঞ্জীত তামুলী, অনুপ বৰপাত্ৰগোঁহাই, সমষ্টিৰ সভাপতি জিতুজ্যোতি গায়ন, দুলাল দাসকে ধৰি বহু নেতা-কৰ্মী উপস্থিত থাকে।