‘নোটা’ ভোটৰ বাবে বিজেপিয়ে হেৰুৱালে নেকি নগাঁও! ; সমগ্ৰ ৰাজ্যত ১,৭৭,৯০১ টা নোটা ভোট  

২৩ মে’ত ঘোষণা কৰা হ’ল দেশৰ সপ্তদশ লোকসভা নিৰ্বাচনৰ ফলাফল। লোকসভা নিৰ্বাচনত ভাৰতীয় জনতা পাৰ্টিয়ে প্ৰধানমন্ত্ৰী নৰেন্দ্ৰ মোডী আৰু ৰাষ্ট্ৰীয় সভাপতি অমিত শ্বাহৰ নেতৃত্বত বৃহৎ সফলতা লাভ কৰি দ্বিতীয় বাৰৰ বাবে দিল্লীৰ শাসনৰ বাঘজৰী হাতত লয়।

ভাৰতৰ লগতে অসমতো ১৪ টা সমষ্টিৰ ভিতৰত ৯ টা বিজেপিয়ে, ৩ টা কংগ্ৰেছে আৰু এটাকৈ সমষ্টি ক্ৰমে এ আই য়ু ডি এফ আৰু নিৰ্দলীয় প্ৰাৰ্থীয়ে দখল কৰিবলৈ সক্ষম হয়।

উল্লেখনীয় কথাটো হ’ল চলিত নিৰ্বাচনত অসমৰ ১৪ টা সমষ্টিত মুঠ ১,৭৭,৯০১ জন ভোটাৰে কোনো ৰাজনৈতিক দলৰ প্ৰাৰ্থী অথবা নিৰ্দলীয় প্ৰাৰ্থীৰ প্ৰতি সমৰ্থন নেদেখুৱাই নোটা (None of Above)ত ভোট দান কৰে।

নোটাৰ বৰ্দ্ধিত সংখ্যাই অসমৰ জনসাধাৰণৰ ক্ৰমে ৰাজনৈতিক দলসমূহৰ প্ৰতি বাঢ়ি অহা অনিহাক প্ৰকাশ কৰিছে। ইয়াৰ ভিতৰত নাগৰিকত্ব সংশোধনী বিধেয়কো এটা কাৰণ যাৰ বাবে বিজেপিৰ পৰিবৰ্তে কোনো ৰাজনৈতিক বিকল্প বিচাৰি নাপায় অসমৰ এটা বৃহৎ শ্ৰেণীৰ শিক্ষিত জনসাধাৰণে নোটাৰ আশ্ৰয় ল’ব লগা হ’ল।

সদ্যসমাপ্ত লোকসভা নিৰ্বাচনত বিভিন্ন সমষ্টিত নোটাৰ সংখ্যা এনেধৰণৰ-

নোটাৰ পৰিসংখ্যা বিশ্লেষণ কৰিলে দেখা যায় ডিব্ৰুগড়ত সৰ্বাধিক ২১,২৮৮ টা আৰু ধুবুৰীত সৰ্বনিম্ন ১৯৭৮ টা ভোট নোটাত পৰিছে। কৰিমগঞ্জত ৬,৫৫৫ টা ভোট নোটাত পৰিছে।

দুয়োটা সমষ্টিৰ জনগাঠনি মন কৰিলে দেখা যায় ডিব্ৰুগড়ৰ ভোটাৰ সকল হয়তো মূলত অসমীয়া ভাষী আৰু জনজাতি অথবা জনগোষ্ঠীয় আনহাতে কৰিমগঞ্জৰ ভোটাৰসকল মূলত বাংলা ভাষী। সেইফালৰ পৰা লক্ষ্যকৰিলে এটা কথা স্পষ্ট যে ব্ৰহ্মপুত্ৰত বহুতো নাগৰিকত্ব বিৰোধী ভোট বিজেপিৰ পৰিবৰ্তে নোটাত পৰিছে কিন্তু বৰাক উপত্যকাত বিধেয়ক বিৰোধী ভোটৰ সংখ্যা কম।

আনহাতে, বেছিভাগ সমষ্টিত প্ৰাৰ্থীসকল জয়ী হোৱাৰ ক্ষেত্ৰত নোটাৰ ভোটে বিশেষ প্ৰভাৱ পেলোৱা নাই যদিও নগাঁও সমষ্টিৰ ৰূপক শৰ্মা আৰু প্ৰদ্যুত বৰদলৈৰ কঠিন যুজখনত নোটাই বহু পৰিমানে প্ৰভাৱ পেলোৱা যেন অনুমান হয়, য’ত ৰূপক শৰ্মা মাত্ৰ ১৬,৭৫২ টা ভোটত পৰাস্ত হয়। ইয়াৰ সৈতে বিজেপিৰ বিধেয়ক সম্পৰ্কে থকা স্থিতিৰ বাবে বহু খিলঞ্জীয়া নাগৰিকে ৰাজনৈতিক বিকল্প হেৰুৱাই ভোটদান কৰাৰ পৰা বিৰত থাকে। সেই সংখ্যা হিচাপ কৰিব গ’লে লাখৰ ঘৰ চুব।

সকলো দিশ চালি জাৰি চালে এটা কথা স্পষ্ট যে বিজেপিয়ে নাগৰিকত্ব সংশোধনী বিধেয়ক সম্পৰ্কে লৈ থকা স্থিতিৰ বাবে নগাঁও আসনখন হেৰুৱাব লগা হ’ল যাৰ ফলত লাভবান হ’ল কংগ্ৰেছ দল। মোডী ঢৌৰ সময়ত বিজেপিৰ দখলত থকা আসন হেৰুৱাব লগা হোৱাতো অসম বিজেপিৰ বাবে হয়তো অশুভ সময়ৰ আগজাননী।