মহীশূৰ নগৰ উন্নয়ন বিভাগৰ (মুডা)ৰ ভূমি দুৰ্নীতিৰ গোচৰত অধিক বিপদত পৰিছে কৰ্ণাটকৰ মুখ্যমন্ত্ৰী সিদ্দাৰমায়া। কৰ্ণাটক উচ্চ ন্যায়ালয়ে মুখ্যমন্ত্ৰী, তেওঁৰ পত্নী পাৰ্বতী বিএমকে ধৰি কেইবাগৰাকীও লোকক জাননী জাৰি কৰিছে। জানিব পৰা মতে, গোচৰটোৰ চিবিআইৰ তদন্ত বিচাৰি দাখিল কৰা গোচৰৰ পৰিপ্ৰেক্ষিতত এই জাননী জাৰি কৰা হৈছে।
যোৱা ফেব্ৰুৱাৰী মাহত কৰ্ণাটক লোকায়ুক্তই ৩ হাজাৰ কোটি টকাৰ ভূমি কেলেংকাৰীৰ গোচৰত সিদ্দাৰমায়া, পত্নী আৰু আন দুজন অভিযুক্তক ‘ক্লিন চিট’ দিছিল। যদিও আৰক্ষীৰ প্ৰতিবেদনৰ ভিত্তিত লোকায়ুক্তই এই ক্লীন চিট দিছিল। আৰক্ষীৰ প্ৰতিবেদনক প্ৰত্যাহ্বান জনালে ইডিয়ে। শেহতীয়াকৈ আদালতে কয় যে এই গোচৰৰ তদন্ত অব্যাহত ৰাখিব পাৰিব লোকায়ুক্ত আৰক্ষীয়ে। তদন্ত আধৰুৱা হোৱাৰ বাবে আদালতে এতিয়া এই গোচৰৰ ৰায় নিদিয়া বুলিও কয়৷ কোৱা হৈছে যে সম্পূৰ্ণ প্ৰতিবেদন দাখিল কৰাৰ পিছতহে চূড়ান্ত ৰায় দিয়া হ’ব।
মন কৰিবলগীয়া যে মুখ্যমন্ত্ৰী পদ গ্ৰহণ কৰাৰ এবছৰৰ ভিতৰতে সিদ্দাৰমায়াৰৰ বিৰুদ্ধে গুৰুতৰ অভিযোগ উত্থাপন হৈছিল। চৰকাৰী মাটিক লৈ মুখ্যমন্ত্ৰীৰ বিৰুদ্ধে দুৰ্নীতিৰ অভিযোগ উত্থাপন কৰি ৰাজ্যপালৰ কাষ চাপিছিল তিনিজন প্ৰতিবাদকাৰীয়ে। প্ৰতিবাদকাৰীসকলে দাবী কৰে যে সিদ্দাৰমায়াৰই নিজৰ পত্নী পাৰ্বতীক নথি-পত্ৰ সলনি কৰি মুডা বা মহীশূৰ নগৰ উন্নয়ন প্ৰাধিকৰণৰ গৃহ নিৰ্মাণ প্ৰকল্পত সস্তীয়া মূল্যত এটা ব্যয়বহুল প্লট দিছে। ফলত তেওঁ প্ৰায় তিনি হাজাৰ কোটি টকাৰ সুবিধা লাভ কৰিছিল।
কৰ্ণাটকৰ ৰাজ্যপাল থাৱাৰ চান্দ গেহলটে মুখ্যমন্ত্ৰীৰ বিৰুদ্ধে উত্থাপিত অভিযোগৰ তদন্তৰ নিৰ্দেশ দিয়ে। একেদৰে কৰ্ণাটকৰ মুখ্যমন্ত্ৰী তথা কংগ্ৰেছ নেতা সিদ্ধাৰমায়াৰ পত্নী পাৰ্বতী আৰু ভায়েক মল্লিকাৰ্জুনৰ বিৰুদ্ধে ভূমি বিতৰণৰ দুৰ্নীতিৰ অভিযোগত আৰক্ষীৰ এজাহাৰ দাখিল কৰা হয়। সেই উৎসৰ পৰাই এই গোচৰত সিদ্দাৰমায়াৰ নাম জড়িত হৈ পৰিছিল। কৰ্ণাটকৰ ৰাজ্যপাল থাৱাৰ চান্দ গেহলটে সেই গোচৰৰ বিচাৰ আৰম্ভ কৰাত অনুমোদন জনায়। ইয়াৰ পিছতে কৰ্ণাটকৰ লোকায়ুক্ত আদালতৰ নিৰ্দেশত সিদ্ধাৰমায়াৰ বিৰুদ্ধে এফআইআৰ দাখিল কৰা হয়। লোকায়ুক্ত আৰক্ষীয়ে মুখ্যমন্ত্ৰীৰ বিৰুদ্ধে তদন্ত আৰম্ভ কৰিছে। এতিয়া চলিছে তদন্ত চিবিআইক গতাই দিয়াৰ দাবী।
