“গুজৰাট মডেল”—এই শ্লোগান লৈ ২০১৪ চনত দেশ শাসন কৰিবলৈ অহা নৰেন্দ্ৰ মোদীৰ আৰ্হি ৰাজ্যৰ ওপৰত এতিয়া নতুনকৈ প্ৰশ্ন উত্থাপিত হৈছে। আয়কৰ বিভাগৰ শেহতীয়া তথ্যই দেখুৱাইছে যে তথাকথিত উন্নত গুজৰাটে ধনী কৰদাতাৰ ক্ষেত্ৰতো শীৰ্ষ দহৰ ভিতৰত ঠাই পাব পৰা নাই।
তথ্য অনুসৰি, বছৰি ২৫ লাখৰ পৰা ৫০ লাখ টকা পৰ্যন্ত আয় ঘোষণা কৰা কৰদাতাৰ সংখ্যা গুজৰাটত দেশৰ আন বহুত ৰাজ্যতকৈ কম। মহাৰাষ্ট্ৰত এই শ্ৰেণীৰ কৰদাতাৰ সংখ্যা ১.৩৭ লাখ, কৰ্ণাটকত ১.৩০ লাখ আৰু তামিলনাডুত ৪৩.৯ হাজাৰ। তালিকাৰ দশম স্থানত থকা অন্ধ্ৰপ্ৰদেশত ২৬.৭ হাজাৰ কৰদাতাই ২৫-৫০ লাখ আয় ঘোষণা কৰিছে। কিন্তু গুজৰাট এই তালিকাতো ঠাই লাভ কৰা নাই।
কেৱল ধনী কৰদাতাৰ ক্ষেত্ৰতে নহয়, মুঠ কৰদাতাৰ ক্ষেত্ৰতো গুজৰাট যথেষ্ট পিছত। জনসংখ্যাৰ মাত্ৰ ৭ শতাংশৰ আয় ১২ লাখতকৈ অধিক। আনহাতে ঝাৰখণ্ডৰ দৰে পিছপৰা ৰাজ্যতো ২০ শতাংশ লোকৰ আয় ১২ৰ পৰা ৫০ লাখৰ ভিতৰত।
এই তথ্য প্ৰকাশ কৰি তৃণমূল কংগ্ৰেছৰ প্ৰাক্তন ৰাজ্যসভা সাংসদ আৰু প্ৰসাৰ ভাৰতীৰ প্ৰাক্তন মুখ্য কাৰ্যবাহী বিষয়া জাহৰ চৰকাৰে বিজেপিক তীব্ৰ সমালোচনা কৰিছে।
তথাকথিত আদৰ্শ গুজৰাটত ধনী মানুহৰ সংখ্যা কিয় ইমান কম? গুজৰাটবাসীৰ সামগ্ৰিক অৰ্থনীতি নিম্ন হৈ পৰিছে নেকি? নে ইয়াৰ আঁৰত কৰ ফাঁকি দিয়াৰ প্ৰৱণতা লুকাই আছে?
