অখিল ভাৰতীয় বনবাসী কল্যান আশ্ৰম, অসমৰ উদ্যোগত সোণাপুৰৰ টেপেচিয়া লক্ষ্মীবাঈ ৰাষ্ট্ৰীয় শাৰিৰীক শিক্ষানুষ্ঠানত যোৱা ২৭ ডিচেম্বৰৰ পৰা চাৰিদিনীয়াকৈ অনুষ্ঠিত হোৱা ২১ তম ৰাষ্ট্ৰীয় জনজাতি ক্ৰীড়া সমাৰোহৰ অন্তিম দিনা মুখ্য অতিথি ৰূপে উপস্থিত থকা কেন্দ্ৰীয় ৰাজ্যিক গৃহ মন্ত্ৰী কিৰেন ৰিজিজুক দেখা গ’ল এক অনন্য ৰূপত।
খেলা-ধূলা আৰু শৰীৰ চৰ্চাৰ প্ৰতি প্ৰবল আগ্ৰহী কেন্দ্ৰীয় মন্ত্ৰীগৰাকীক সমাৰোহৰ সামৰণি কাৰ্যসূচীত এইবাৰ হাতত ধনু আৰু কাড় লৈ আৰ্চাৰী খেলুৱৈৰ ৰূপত দেখিবলৈ পোৱা গ’ল। মন্ত্ৰীগৰাকীৰ এই নতুন ৰূপ দেখি ক্ৰীড়া সমাৰোহত উপস্থিত থকা ক্ৰীড়া অনুৰাগী তথা সাধাৰণ লোকসকল যথেষ্ট পৰিমানে উৎসাহী হোৱা পৰিলক্ষিত হয়।
আনহাতে অনুষ্ঠানত ৰিজিজুৱে কয় যে ক্ৰীড়া জীৱনৰ বাবে এক অভিন্ন অংগ তথা ভাৰতত প্ৰচলিত বিভিন্ন ক্ৰীড়া ভাৰতীয় সভ্যতাৰ পৰিচয়। তেওঁৰ মতে ‘বহুতো জনজাতীয় খেলুৱৈ জন্মগত প্ৰতিভাৰ অধিকাৰী। এনেধৰণৰ ক্ৰীড়া সমাৰোহৰ আয়োজনে জনজাতীয় খেলুৱৈসকলৰ প্ৰতিভা বিকাশৰ ক্ষেত্ৰত যথেষ্ট সহায়ক হ’ব’।
তেওঁ বক্তব্যৰ মাজতে ক্ৰীড়া সমাৰোহত অংশ লোৱা খেলুৱৈসকলক উৎসাহিত কৰিবৰ বাবে কয় ‘প্ৰধান মন্ত্ৰী নৰেন্দ্ৰ মোদীৰ নেতৃত্বত জনজাতীয় খেলুৱৈসকলৰ প্ৰশিক্ষণৰ বাবে বিভিন্ন আঁচনিৰে অলিম্পিয়ান কডিয়ান গঠন কৰি খেলুৱৈসকলক প্ৰশিক্ষণৰ ব্যৱস্থা হাতত লৈছে। ইয়াৰ জৰিয়তে ট’কিঅত অনুষ্ঠিত হ’বলগীয়া অলিম্পিকত অধিকসংখ্যক পদক লাভ কৰিবলৈ সক্ষম হ’ব।‘
মন কৰিবলগীয়া যে ভিন্ন সময়ত মন্ত্ৰীগৰাকীয়ে ছ’চিয়েল মেডিয়াৰ যোগেদি চাইকেল চলোৱা, শৰীৰ চৰ্চা আদিৰ বিশেষ ভিডিঅ’ আপল’ড কৰি সকলোকে শৰীৰ সুস্থ ৰাখিবৰ বাবে আহ্বানো জনায়।
প্ৰসংগক্ৰমে উল্লেখ কৰিব পাৰি যে, উক্ত ক্ৰীড়া সমাৰোহৰ শেষৰ দিনা পুৱা ৬:৩০ বজাৰ পৰা ক্ষেত্ৰী বিবেকানন্দ ছায়েন্স একাডেমিৰ পৰা লক্ষ্মীবাঈ শাৰিৰীক শিক্ষণ কেন্দ্ৰলৈ এক মাৰাথান দৌৰ অনুষ্ঠিত কৰাৰ লগতে মুকলি সভাৰ লগত সংগতি ৰাখি সাংস্কৃতিক কাৰ্য্যসূচীও অনুষ্ঠিত কৰা হয়।
