ভাৰতৰ প্ৰথমগৰাকী মাউণ্ট এভাৰেষ্ট শৃংগ আৰোহণকাৰী মহিলা উত্তৰাখণ্ডৰ বাচেন্দ্ৰী পালে(৬৮) এটি ৫০ বছৰ ঊৰ্ধৰ বাৰজনীয়া মহিলা দলৰ সৈতে বঙাইগাঁও আৱৰ্ত ভৱনত উপস্থিত হৈছে ৷
৫০ বছৰৰ ঊৰ্দ্ধৰ মহিলাসকলক লৈ ট্ৰান্স হিমালয়ান এক্সপিডিচন – ২২ (Fit @50+Women Trans Himalayan Expedition ’22) মিছনৰ অধীনত অৰুণাচল প্ৰদেশৰ নিকটৱৰ্তী পাংছুপাছ নামৰ ঠাইৰ পৰা ১২ মাৰ্চত যাত্ৰা আৰম্ভ কৰি বুধবাৰে বঙাইগাঁৱত উপস্থিত হৈছেহি। তেওঁলোকে প্ৰতিদিনে ২০কিলোমিটাৰ খোজকাঢ়ি প্ৰমাণ কৰিছে যে ৫০ বছৰ বা ৬০ বছৰ বয়স পাৰ হ’লেও বয়সে এই দুঃসাহসিক যাত্ৰাত বাধাৰ সৃষ্টি কৰিব নোৱাৰে।
বাৰগৰাকী মহিলা আৰু আন ৪ জন সহায়কাৰীৰ সৈতে আহি বঙাইগাঁও আৱৰ্ত ভৱনত উপস্থিত হোৱা বাচেন্দ্ৰী পাল আৰু তেওঁৰ সহযোগীসকলক জিলা উপায়ুক্ত ডা:এম এছ লক্ষ্মী প্ৰিয়াই উষ্ম আদৰণি জনায়। উল্লেখ্য যে টাটা ষ্টীল এডভেঞ্চাৰ ফাউণ্ডেচন আৰু কেন্দ্ৰীয় যুৱ পৰিক্ৰমা আৰু ক্ৰীড়া মন্ত্ৰনালয়ৰ যুটীয়া উদ্যোগত আৰু ভাৰতীয় সেনা আৰু ইণ্ডো- তিব্বত সীমান্ত আৰক্ষী বাহিনীৰ সহযোগত বাচেন্দ্ৰী পালে তেওঁৰ সহযোগীসকলৰ সৈতে অৰুণাচলৰ পৰা লাডাখলৈ ৪,৯৭৭ কিলোমিটাৰতকৈও অধিক দূৰত্ব অতিক্ৰম কৰাৰ লক্ষ্যেৰে ২০২২ চনৰ মাৰ্চ মাহৰ পৰা আগষ্ট লৈ ৫ মহীয়া এই দুঃসাহসিক যাত্ৰা আৰম্ভ কৰিছে ৷
এই দুঃসাহসিক যাত্ৰা ৮ মাৰ্চত দিল্লীত শুভাৰম্ভ কৰা হৈছিল আৰু আগষ্ট মাহৰ প্ৰথম সপ্তাহত অন্ত পৰিব। বাচেন্দ্ৰী পালে পৰ্বতাৰোহণৰ উপৰিও গুজৰাটৰ ভূজ ভূমিকম্প আৰু উৰিষ্যাৰ ছুনামী দুৰ্যোগৰ সময়ছোৱাত সাহায্য আগবঢ়োৱাত নেতৃত্ব লোৱাৰ লগতে উত্তৰাখণ্ডৰ বানপানীৰ সময়ত সাহায্য আৰু উদ্ধাৰ অভিযানত সহায় কৰাৰ উপৰি দুৰ্গম হিমালয়ান গাঁওবিলাকতো সহায়-সাহায্য আগবঢ়াই আহিছে।
পৰ্বতাৰোণকাৰী বাচেন্দ্ৰী পালে ইতিমধ্যে পদ্মশ্ৰী,পদ্ম ভূষণ, অৰ্জুন, টেনজিং নৰ্গে আদি বঁটা পোৱাৰ উপৰিও তেওঁ আন অসংখ্য বঁটা আৰু সন্মানেৰে সন্মানিত হৈছে। বুধবাৰে বঙাইগাঁৱত নিশাটো কটোৱাৰ পিচত বৃহস্পতিবাৰে পুৱা ৪ বজাত পুনৰ তেওঁলোকে খোজকাঢ়ি যাত্ৰা আৰম্ভ কৰে। ইপিনে চলিত মাহৰ দ্বিতীয় সপ্তাহত অৰুণাচল প্ৰদেশৰ পাংছুপাছত ৫০ বছৰৰ ঊৰ্দ্ধৰ মহিলাসকলক লৈ ট্ৰান্স হিমালয়ান এক্সপিডিচন আৰম্ভ কৰাৰ বাবে উত্তৰ পূৰ্বাঞ্চললৈ অহা পৰ্বতাৰোহী বাচেন্দ্ৰি পালে সংবাদ মাধ্যমৰ আগত এই দু:সাহসিক অভিযান লাডাখৰ ড্ৰাছ-কাৰ্গিল এলেকাৰ টাইগাৰ হিলছত সমাপ্ত হ’ব বুলি জানিবলৈ দিয়ে ।
তেওঁ লগতে কয় যে স্বাস্থ্যৱান থাকিলে যে বয়সেও বাধাৰ প্ৰাচীৰ হ’ব নোৱাৰে আৰু যি কোনো কাম কৰিব পাৰি তাকে ইয়াৰ দ্বাৰা প্ৰমাণ কৰিবলৈ এনে পদক্ষেপ গ্ৰহণ কৰা হৈছে ৷ কাৰণ পৰিয়ালৰ মহিলা, পুৰুষসকল যদি স্বাস্থ্যৱান হৈ থকে তেতিয়ালে পৰিয়ালটো স্বাস্থ্যৱান হৈ থাকিব ৷ পৰিয়াল সুস্বাস্থ্যৱান হৈ থাকিলে সমাজ আৰু দেশো স্বাস্থ্যৱান হৈ থাকিব বুলি তেওঁ মন্তব্য কৰে।
পৰ্বতাৰোণকাৰী বাচেন্দ্ৰী পালৰ নেতৃত্বত এই দুঃ সাহসিক যাত্ৰা কৰা দলটোৰ আন সদস্যসকল হ’ল পশ্চিমবংগৰ চেতনা চাহু( ৫৫), চত্তিশগড়ৰ সবিতা ধপৱাল( ৫৩) , গুজৰাটৰ চাওলা যোগীৰদাৰ( ৬৪), গাংগোত্ৰী সোনেজী( ৬৩) , ঝাৰখণ্ডৰ পায়ো মুৰ্মু( ৫৪) , অন্নপূৰ্ণা এল ( ৫২) , ৰাজস্থানৰ ডাঃ সুষমা বিশ্ব( ৫৬) , উত্তৰ প্ৰদেশৰ মেজৰ কৃষ্ণা ডুবে ( ৫৬) ,মহাৰাষ্ট্ৰৰ বিমলা ডেওস্কাৰ ( ৫৬) ,কৰ্ণাটকৰ বসুমতী শ্ৰীনিবাসন( ৬৮) , শমলা পদ্মনাভন( ৬৫) আদি৷
