অসমৰ দুটাকৈ কাগজ কল আৰু কোভিড পৰিস্থিতিক লৈ শুক্ৰবাৰে আঞ্চলিক গণ মৰ্চাৰ সভাপতি তথা ৰাজ্যসভাৰ সাংসদ অজিত কুমাৰ ভূঞা আৰু মনজিৎ মহন্তই সংবাদমেল অনুষ্ঠিত কৰে।
সংবাদমেলত বিজেপি চৰকাৰক কটাক্ষ কৰি অজিত কুমাৰ ভুঞাই কয় ‘দক্ষ’ মুখ্যমন্ত্ৰীৰ দিনত অসমৰ দুটাকৈ কাগজ কল পানীৰ দৰত বিক্ৰী কৰিবলৈ সাজু হৈছে।কেৱল ফাঁকিৰে চলিছে বিজেপি চৰকাৰ।
নিয়মীয়াকৈ দা-দৰমহা পাই থকা মুৰব্বীজনে হঠাৎ আজিৰ পৰা দৰমহা নাপালে কি অৱস্থা হ’ব?বুলি প্ৰশ্ন কৰি ভুঞাই লগতে কয় “জাগীৰোডৰ অশোক কাগজ কলৰ কৰ্মচাৰীসকলৰো সেই অৱস্থাই হৈছিল ২০১৭চনৰ ১৩ মাৰ্চৰ পৰা। লাভজনকভাৱে চলি থকা কাগজ কলটোৰ উৎপাদন হঠাৎ বন্ধ কৰি দিয়া হ’ল।হাহাকাৰ লাগিছিল ৩০০০ কৰ্মচাৰীৰ মাজত।”
সংবাদমেলৰ জৰিয়তে জাগীৰোডৰ অশোক কল বিক্ৰীৰ সিদ্ধান্তৰ তীব্ৰ বিৰোধিতা কৰে সাংসদগৰাকীয়ে।
ভূঞাই কয় যে নিৰ্বাচনৰ আগতে বিজেপিৰ কেন্দ্ৰীয় মন্ত্ৰী অমিত শ্বাহে চিঞৰি চিঞৰি কৈছিল যে জাগীৰোড আৰু কাছাৰৰ কাগজ কল দুটা পুনৰ জীয়াই তুলিব।এই বাণী শুনি অসমৰ বহু ৰাইজৰ লগতে বৰ্তমানৰ মুখ্যমন্ত্ৰী হিমন্ত বিশ্ব শৰ্মাই একেলগে তাল মিলাই নাচিছিল।কিন্তু সেই সকলো মিছা প্ৰতিপন্ন কৰি দুদিন পিছত খবৰ পোৱা গল যে সেই কাগজ কল দুটা নিলামত যাব।
অসমৰ বৰ্তমানৰ মুখ্যমন্ত্ৰীজনে যোৱা ১৫ টা বছৰে শিক্ষা বিভাগ আৰু স্বাস্থ্য বিভাগটোৰ ইমানেই কাম কৰিলে যে সামান্য অৰ্থনৈতিকভাৱে সচ্চল পৰিয়াল এটায়েও চৰকাৰী স্কুল,চৰকাৰী হস্পিতাললৈ পৰিয়ালৰ সদস্য পঠিয়াব নোখোজে।এতিয়া এই ‘দক্ষ’ মুখ্যমন্ত্ৰীজনৰ দিনত অসমৰ দুটাকৈ কাগজ কল পানীৰ দৰত বিক্ৰী হব সেইয়া লক্ষণীয়।অসমত এয়াই দক্ষতা।”
কেৰেলা,তামিলনাডু,দিল্লীৰ দক্ষতাৰ প্ৰসংগত উদাহৰণ দি অজিত ভুঞাই পুনৰ কয়”কেৰেলা,তামিলনাডুৰ নিচিনা ৰাজ্যই বিনামূলীয়াকৈ কোভিড চিকিৎসা সেৱা কৰি থকা দেখা পোৱা গৈছে। চৰকাৰী তথা ব্যক্তিগত চিকিৎসালয় সমূহে সকলো ৰোগীক বিনামূলীয়াকৈ চিকিৎসা সেৱা আগ বঢ়াই আছে।দেশৰ অন্যান্য ৰাজ্যৰ তুলনাত অসমত চিকিৎসা ব্যৱস্থাত চৰম বিশৃংখলতা আজিও বিদ্যমান।ভেকচিনেচনৰ ক্ষেত্ৰত অসমৰ শতকৰা হাৰ পুতৌজনক।”
আনহাতে নিজৰ ব্যৰ্থতা ঢাকিবলৈ চৰকাৰে প্ৰথম আৰু দ্বিতীয় পালি ভেকচিনৰ মাজৰ ব্যৱধান বাৰম্বাৰ নিজৰ খেয়াল-খুচি মতে সাল-সলনি কৰি থকাৰ ফলত সাধাৰণ ৰাইজে চৰম দুৰ্ভোগ ভুগিবলগীয়া হৈছে বুলিও অজিত ভূঞাই মন্তব্য কৰে।
