টীয়কৰ কলিয়াপানীস্থিত শ্ৰী শ্ৰী আউনীআটী শাখা সত্ৰৰ সংগ্ৰহালয়ৰ দ্বাৰ মুকলি
ঐতিহাসিক শ্ৰী শ্ৰী আউনীআটীত সত্ৰৰ একাদশ সত্ৰাধিকাৰ বৈকুণ্ঠী দেৱদত্তদেৱ গোঁসাই ঈশ্বৰৰ দ্বাৰা প্ৰতিষ্ঠিত যোৰহাটৰ ভট্টাচাৰ্য্য পৰিয়ালৰ যোগেদি প্ৰাপ্ত ধৰ্ম প্ৰকাশ যন্ত্ৰসহিতে বহু সংখ্যক দুৰ্লভ সম্পদেৰে পৰিপূৰ্ণ এটা সংগ্ৰাহালয় আজি যোৰহাট জিলাৰ টীয়কৰ কলিয়াপানীস্থিত আউনীআটী শাখা সত্ৰৰ প্ৰাংগণত শুভাৰম্ভ কৰা হয় ।
উল্লেখযোগ্য যে, এই ছপা যন্ত্ৰটি ১৮৬৯ চনত ইংলেণ্ডত তৈয়াৰ কৰাৰ পাছত কলকতাৰ পৰা সংগ্ৰহ কৰি এই সত্ৰলৈ অনা হৈছিল।
সংগৃহীত এই সম্পদ সমূহৰ ভিতৰত পৌৰাণিক বিবাহ কাৰ্যত ব্যৱহৃত দোলা, পিতলৰ শৰাই, সিংহাসন, হাতী দাঁতৰ খৰম, হাতী দাঁতৰ জপা, সাঁচিপাতৰ পুথি, ফুল বচা ৰূপৰ শৰাই, কাঠৰ কৃষ্ণ মূৰ্তি, ৰূপৰ বান বাতি, ৰূপৰ ঢগধগী লোটা, কাঁহৰ ৰজা দিনীয় বৰথাল আদি কৰি প্ৰায় তিনিশৰো অধিক দুষ্প্ৰাপ্য সম্পদ দর্শনাৰ্থীৰ বাবে চোৱাৰ সুব্যৱস্থা কৰিছে।
উক্ত অনুষ্ঠান শুভাৰম্ভ কৰে সত্ৰাধিকাৰ ড° পিতাম্বৰ দেৱগোস্বামীয়ে।
সদৌ অসম ছাত্ৰ সন্থাৰ সাধাৰণ সম্পাদক লুৰিণজ্যোতি গগৈ উপস্থিত থকা উদ্বোধনী অনুষ্ঠানটিত যোৰহাট জিলা ছাত্ৰ সন্থাৰ সাধাৰণ সম্পাদক জিতু নেওগৰ লগতে শ্ৰী শ্ৰী পুনিয়া সত্ৰৰ নীলমণি গোস্বামী, প্ৰাক্তন অৱসৰ প্ৰাপ্ত অধ্যক্ষ টুৱাৰাম খনিকৰ, অনন্ত শৰ্মা, ৰাজু দাসকে ধৰি ভালে সংখ্যক বৈষ্ণৱ ভক্ত উপস্থিত থাকে।
ক’ৰ’না মহামাৰী সংক্ৰমণ ৰোধৰ বাবে সামাজিক দূৰত্ব বজাই ৰাখি চৰকাৰী সকলো নীতি নিৰ্দেশনা অৱলম্বন কৰি সমগ্ৰ অনুষ্ঠানটি অনুষ্ঠিত কৰা হয় আজিৰ এই বিশেষ দিনটোত।
অনুষ্ঠানত সত্ৰাধিকাৰ আৰু আছুৰ সাধাৰণ সম্পাদক দুয়োগৰাকী বিশিষ্ট ব্যক্তিয়ে এই সংগ্ৰাহলয়লৈ কোনো ব্যক্তিৰ ঘৰত থকা ঐতিহাসিক সমল মুক্তহস্তে দান কৰি সংগ্ৰাহলয়টি আৰু অধিক আকৰ্ষণীয় কৰিবলৈ আহ্বান জনায়।