বিটিচি নিৰ্বাচনৰ পূৰ্বে আজি দিছপুৰ প্ৰেছ ক্লাৱত এখন গুৰুত্বপূৰ্ণ সংবাদমেল সম্বোধন কৰে কোকৰাঝাৰ লোকসভা সমষ্টিৰ সাংসদ নৱ কুমাৰ শৰণীয়াই।
সংবাদমেলত শৰণীয়াই বিটিচি নিৰ্বাচনৰ পূৰ্বে ৰঞ্জন দৈমাৰী মুকলি আকাশৰ তললৈ ওলাই আহিব বুলি ধাৰণা কৰা হৈছে বুলি উল্লেখ কৰে।
আনহাতে, এপ্ৰিলত অনুষ্ঠিত হ’বলগীয়া বিটিচি নিৰ্বাচনৰ পূৰ্বে নৱ কুমাৰ শৰণীয়াই এটা নতুন ৰাজনৈতিক দল গঠন কৰাৰ সিদ্ধান্ত গ্ৰহণ কৰিছে বুলি উল্লেখ কৰি নিৰ্বাচনৰ দিন ঘোষণাৰ পূৰ্বে দলটোৰ প্ৰয়োজনীয় পঞ্জীয়নৰ কাম-কাজ হৈ যাব বুলি আশা প্ৰকাশ কৰে।
শৰণীয়াই তেওঁৰ নেতৃত্বত বিটিআৰত গঠন হ’বলগীয়া নতুন ৰাজনৈতিক দলটোৱে বিটিচিৰ ৪০ টা সমষ্টিতে প্ৰতিদ্বন্দ্বিতা আগবঢ়াব বুলি ঘোষণা কৰি বিএলটিৰ দিনৰ বিটিএডি এলেকাৰ মাৰণাস্ত্ৰসমূহ বাজেয়াপ্ত কৰাৰ বাবে চৰকাৰলৈ আহ্বান জনায়।
তদুপৰি, নিৰ্বাচনৰ পূৰ্বে নৱ কুমাৰ শৰণীয়াৰ নতুন ৰাজনৈতিক দলটোৱে কাৰো লগত মিত্ৰতা নকৰে বুলি শৰণীয়াই উল্লেখ কৰিলেও মিত্ৰতাৰ বাবে সকলোৰে বাবে দুৱাৰ খোলা আছে বুলিও কয়।
নিখিল বড়ো ছাত্ৰ সন্থাৰ সদ্য বিদায়ী সভাপতি প্ৰমোদ বড়োৱে য়ু জি ব্ৰহ্ম নেতৃত্বাধীন য়ু পি পি এলত যোগদান কৰিলেও বড়োৰ এই যোগদানে ব্ৰহ্মক কনোধৰণে সহায় নকৰে বুলিও সংবাদমেলত শৰণীয়াই মত প্ৰকাশ কৰে।
আগন্তুক বিটিচি নিৰ্বাচনত বিজেপি, বিপিএফৰ সৈতে ৩টা সমষ্টিত পূৰ্ণ প্ৰতিদ্বন্দ্বিতাৰ সম্ভাৱনাৰ কথা ব্যক্ত কৰে সাংসদ গৰাকীয়ে।
বিটিচি নিৰ্বাচনৰ পূৰ্বে অঞ্চলটোত সৃষ্টি হোৱা হিংসাত্মক ঘটনা সন্দৰ্ভত মত ব্যক্ত কৰি শৰণীয়াই বিচিটি নিৰ্বাচন শান্তিপুৰ্ণভাৱে অনুষ্ঠিত হোৱাৰ কামনা কৰে।
‘‘ওদালগুৰিত BPF কৰ্মী খাইৰুল ইছলামক গুলীয়াই হত্যা কৰা হ’ল। বিটিচিৰ মূৰব্বী হাগ্ৰামা মহিলাৰীয়ে এই হত্যাকাণ্ডত আমাৰ দল জড়িত হৈ আছে বুলি দাবী কৰিছে৷ আমাৰ দাবী, তেওঁৰ হাতত যদি তথ্য আছে ৰাজহুৱা কৰক৷ আমি চিবিআই তদন্ত বিচাৰিছো৷ বিটিআৰ চুক্তিৰ এমাহ নৌহতেই এনে হত্যাকাণ্ড চিন্তনীয়৷ আমি আগতেই কৈছিলো যে বিটিচি নিৰ্বাচন ৰক্তক্ষয়ী হ’ব,’’ সংবাদমেলত শৰণীয়াৰ মন্তব্য।
ইপিনে, হাগ্ৰামাই যি পোন্ধৰজনীয়া প্ৰাৰ্থী দিছে, তেওঁলোকৰ এজনো নিৰ্বাচনত জিকিব নোৱাৰে বুলিও নৱ কুমাৰ শৰণীয়া লগতে কয়।
BTCৰ পৰা গাঁৱ কৰ্তনৰ বাবে আয়োগৰ সন্মুখত আমাৰ দলে যুক্তি দিব ৷ আমাৰ চৰকাৰ হ’লে, প্ৰথমখন কেবিনেটতে আমি গাঁৱ কৰ্তনৰ প্ৰস্তাৱ লম ৷
‘‘বিটিচিবাসী ৰাইজে আমাক যিমান বিশ্বাস কৰে সেই কথা বিপিএফে নাজানে৷ বিটিচিবাসীয়ে পৰিৱৰ্তন বিচাৰিছে৷ বিটিআৰ চুক্তি কৰাৰ আগত ৰাইজৰ লগত আলোচনা কৰা হোৱা নাছিল৷ আবছুৰ বিদায়ী সভাপতি প্ৰমোদ বড়ো এতিয়া বাল্মীকি হ’ব বিচাৰিছে৷ এইবাৰ নহয়, ২০২৫ত হে প্ৰমোদ বড়োৱে বিটিচি চীফ হ’ব পাৰিব,’’ সাংসদ গৰাকীয়ে লগতে কয়।
আলোচনাপন্থী আলফা নেতা সন্দৰ্ভতো মত প্ৰকাশ কৰি নৱ কুমাৰ শৰণীয়াই একাংশ আলোচনাপন্থী আলফা নেতা হাগ্ৰামা মহিলাৰীৰ বহতীয়া বুলি উল্লেখ কৰে।
‘‘একাংশ আলোচনাপন্থী আলফা নেতা হাগ্ৰামাৰ বহতীয়া। উঠ বুলি ক’লে উঠিব, বহ বুলি ক’লে বহিব, সি অনুপ চেতীয়া, মিথিংগা দৈমাৰী বা প্ৰাণজিৎ চহৰীয়াই হওক৷ মিথিংগাই অবড়ো সুৰক্ষা কমিটিৰ হৈ কাম কৰিলে দলীয় আলোচনা পন্থী আলফা সদস্যক কোবাই খেদিব বুলি ভাবুকি দিছে,’’ নৱ কুমাৰ শৰণীয়াৰ গুৰুত্বপূৰ্ণ অভিযোগ।
প্ৰতিবেশী ভূটানৰ লগত সম্পৰ্ক উন্নীত কৰি সীমান্তত ব্যৱসায়িক, সাংস্কৃতিক কেন্দ্ৰ প্ৰতিষ্ঠা কৰাৰ ক্ষেত্ৰতো গুৰুত্ব আৰোপ কৰে সাংসদ গৰাকীয়ে। বিশ্বৰ বিভিন্ন প্ৰান্তৰ পৰা বছৰত যাতে এক কোটি মানুহে বিটিচি পৰিভ্ৰমণ কৰে তাৰ বাবে আঁচনি গ্ৰহণ কৰাৰ লগতে নিৱনুৱা সমস্যা সমাধানৰ বাবেও কাম কৰা হ’ব বুলি শৰণীয়াই কয়।
হাগ্ৰামা মহিলাৰীক কোনোবাই বছাব গ’লে সিয়ো একেডাল ৰছীতে ফাঁচ লৈ মৰিব লাগিব বুলি হাগ্ৰামাক কটাক্ষ কৰি শৰণীয়াই এইবাৰ কোনোৱে হাগ্ৰামাক বছাব নাযায় বুলি মত প্ৰকাশ কৰে।
‘‘মই যদি এছ পি হ’লেহেতেন, দুঘণ্টাৰ ভিতৰত বিটিচিৰ দুৰ্নীতিৰ হিচাপ উলিয়াই দিলো হেতেন। বিটিচিৰ দুৰ্নীতিৰ তদন্তৰ ভাৰ চিবিআইক অৰ্পন কৰক,’’ শৰণীয়াৰ সংবাদ মেলত দাবী।
