৬জন হত্যাকাৰীক যাৱজ্জীৱন কাৰাদণ্ড নগাঁও আদালতৰ

নগাঁও জিলা আৰু সত্ৰ ন্যায়াধীশৰ আদালতে এক হত্যাৰ গোচৰত যোৱা সোমবাৰে ৬জন লোকক যাৱজ্জীৱন কাৰাদণ্ডৰ হুকুম দিয়ে।

ন্যায়াধীশ ৰীতা ক’ৰৰ আদালতে যাৱজ্জীৱন কাৰাদণ্ডৰ লগতে  ১০ হাজাৰ টকাৰ জৰিমনা বিহা অভিযুক্ত লোককেইজন হৈছে নগাঁও জিলাৰ ধিং থানাৰ অন্তৰ্গত ২নং কান্ধুলিমাৰী গাঁৱৰ আব্দুল হাকিম, আজিজুল হক, ছাহেদ আলী, মিঞা হুছেইন, আব্দুৰ ৰহিম আৰু ৰৌমাৰী গাঁৱৰ হবিবুৰ ৰহমান।

উল্লেখযোগ্য যে উক্ত লোককেইজনে ২০০৮ চনৰ ১৩ এপ্ৰিলত ২নং কান্ধুলিমাৰী গাঁৱৰ আজিবুৰ ৰহমান নামৰ এজন লোকক হত্যা কৰি মাৰপাট খেতিৰ মাজত পুতি থৈছিল।

পিছত নিহত লোকজনৰ পত্নী ৰুমেনা খাতুনে ধিং থানাত ঘটনা সম্পৰ্কত দাখিল কৰা এজাহাৰৰ ভিত্তিত আৰক্ষীয়ে অভিযুক্ত লোককেইজনৰ বিৰুদ্ধে ভাৰতীয় দণ্ডবিধিৰ ৩০২/২০১/৩৪ ধাৰাৰ অধীনত ৬১/২০০৮ নম্বৰত এটা গোচৰ ৰুজু কৰি আদালতত চাৰ্জশ্বিট দাখিল কৰিছিল।