নিৰ্বাচনী আয়োগৰ ৰঙা চকু : দোষমুক্ত নোহোৱালৈ নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত ৰাজেন গোঁহাইৰ
যৌন কেলেংকাৰিৰ গোচৰত অভিযুক্ত নগাঁওৰ সাংসদ ৰাজেন গোঁহায়ে আজি আগন্তুক লোকসভা নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত সংবাদ মাধ্যমযোগে ৰাজহুৱা কৰিছে। বিজেপি দলৰ প্ৰাৰ্থীৰ তালিকা ঘোষণাৰ প্ৰাকক্ষণত ৰাজেন গোঁহাইৰ এনে সিদ্ধান্তই বিশেষ তাৎপৰ্য্য বহন কৰিছে।
নগাঁও সমষ্টিৰ বৰ্তমানৰ সাংসদ গোঁহায়ে আজি সাংবাদিকৰ আগত তেওঁৰ বিৰুদ্ধে চলি থকা যৌন কেলেংকাৰিৰ গোচৰৰ বাবেই আগন্তুক লোকসভা নিৰ্বাচনত প্ৰতিদ্বন্দ্বিতা কৰাৰ পৰা বিৰত থাকে বুলি উল্লেখ কৰে।
গোঁহায়ে তেওঁৰ বিৰুদ্ধে উত্থাপিত অভিযোগক মিছা আখ্যা দিলেও এতিয়ালৈ উচ্চ ন্যায়ালয়ে তেওঁক সম্পুৰ্ণ দোষমুক্ত ঘোষণা কৰা নাই বুলি উল্লেখ কৰি কয় যে, মিছা অভিযোগটো সন্দৰ্ভত আৰক্ষীয়ে অনুসন্ধান চলায়ো একো নাপালে আৰু নিম্ন আদালতেও তেওঁক ক্লীন শ্বিট দিছে।
উল্লেখযোগ্য যে, উচ্চ ন্যায়ালয়ে গোচৰটোত বৰ্তমানে স্থগিতাদেশ দিছিল যদিও ২৫ মাৰ্চত গোচৰৰ শুনানি আছে। আনহাতে, নিৰ্বাচনত মনোনয়ন পত্ৰ দাখিলৰ অন্তিম দিন ২৬ মাৰ্চ, গতিকে কিবা কাৰণত যদিহে মনোনয়ন পত্ৰ দাখিলৰ পূৰ্বে নিৰ্দোষী বুলি ৰায়দান লাভ নকৰিবও পাৰে বুলি সাংসদ গৰাকীয়ে সন্দেহ প্ৰকাশ কৰে।
নিৰ্বাচনী আয়োগৰ সাংসদ সকলৰ অপৰাধমূলক গোচৰৰ প্ৰতি থকা কঠোৰ নিৰ্দেশনাৰ প্ৰতি লক্ষ্যৰাখি মনোনয়ন পত্ৰ বাতিলৰ ভয়ত সম্পুৰ্ণ দোষমুক্ত নোহোৱালৈ নিৰ্বাচনত প্ৰতিদ্বন্দ্বিতা নকৰাৰ সিদ্ধান্ত গ্ৰহণ কৰে ৰাজেন গোঁহায়ে। আনহাতে, তেওঁ এই সিদ্ধান্ত দলৰ স্বাৰ্থত লৈছে বুলিহে সংবাদ মাধ্যমৰ আগত প্ৰকাশ কৰে।