নগাঁও আৰু কাছাৰ কাগজ কলক পুনৰুজ্জীৱিত কৰাৰ ক্ষেত্ৰৰত কেন্দ্ৰ তথা ৰাজ্য চৰকাৰে আজিলৈকে কোনো ধৰণৰ ব্যৱস্থা গ্ৰহণ নকৰাৰ প্ৰতিবাদত নগাঁও কাগজ কলৰ কাগজ নিগম কৰ্মী ইউনিয়নে আজি দিনৰ ২ বজাৰ পৰা ১৫ আগষ্টৰ আবেলি ৫ বজালৈ অনশন কাৰ্যসূচী ৰূপায়ন কৰিব।
হিন্দুস্তান কাগজ নিগমৰ অধীনৰ নগাঁও আৰু কাছাৰ কাগজ কল দুটা মুকলি কৰাৰ ক্ষেত্ৰত দীৰ্ঘদিনৰে পৰা চৰকাৰে অৱহেলা কৰি অহাৰ লগতে বিভিন্ন সময়ত দি অহা প্ৰতিশ্ৰুতিসমূহ পূৰণত ব্যৰ্থ হৈছে। ইয়াৰে প্ৰতিবাদত নগাঁও কাগজ কলৰ কাগজ নিগম কৰ্মী ইউনিয়নে আজি জাগীৰোডৰ বিভিন্ন দল সংগঠনৰ সহযোগত অনশন কাৰ্যসূচী ৰূপায়ন কৰিব।
বিগত প্ৰায় ১৭ মাহ ধৰি বন্ধ হৈ থকা নগাঁও আৰু কাছাৰ কাগজ কল দুটা পুনৰ কাৰ্যক্ষম কৰি তোলাৰ বাবে কেন্দ্ৰ তথা ৰাজ্য চৰকাৰৰ লগত কেইবালানিও আলোচনা কৰা হৈছে যদিও এনে আলোচনাই কোনো সুফল কঢ়িয়াই আনিব পৰা নাই। কেৱল আলোচনা আৰু আশ্বাসৰ মাজতে সীমাবদ্ধ হৈ থকা বিষয়টোত কাগজ নিগম কৰ্মী ইউনিয়নে ক্ষোভ ব্যক্ত কৰিছে।
কেইবামাহো ধৰি দৰমহা নোপোৱা তথা নগাঁও আৰু কাছাৰ কাগজ কল দুটা পুনৰ কাৰ্যক্ষম কৰি তোলাৰ দাবীত ইউনিয়নে এই প্ৰতিবাদী কাৰ্যসূচী গ্ৰহণ কৰিছে। আনহাতে, অহা ১৭ আগষ্টত পুৱা দহ বজাৰ পৰা পথ অৱৰোধ কাৰ্যসূচী গ্ৰহণ কৰা বুলিও জানিব দিছে ইউনিয়নে।
