বিশিষ্ট সাহিত্যিক তথা অসম সাহিত্য সভাৰ প্ৰাক্তন সভাপতি ড০ নগেন শইকীয়ালৈ অকাডেমিৰ সৰ্বোচ্চ সন্মান ‘সাহিত্য অকাডেমি ফেল’’ আগবঢ়োৱা হৈছে। সাহিত্য ক্ষেত্ৰলৈ আগবঢ়োৱা অনবদ্য অৱদানৰ বাবেই সাহিত্য পৰিষদৰ সভাই এই গৰাকী অসমৰ সাহিত্যিকক উক্ত সন্মানেৰে সন্মানিত কৰাৰ সিদ্ধান্ত গ্ৰহণ কৰে।
এই খবৰ পোৱাৰ পাছতে ড০ শইকীয়াই নিজৰ মনৰ ভাব নৰ্থ-ইষ্ট নাওৰ আগত প্ৰকাশ কৰি কয়, ‘সাহিত্য অকাডেমিৰ সম্পাদকে মোক ২ মান বজাত ফোন কৰি জনায় যে সাহিত্য পৰিষদৰ সভাই সাহিত্য অকাডেমি ফেল’ৰ বাবে মোৰ নামটো নিৰ্বাচিত কৰিছে। এই খবৰত মই যথেষ্ট উৎফুল্লতি কাৰণ সাহিত্য অকাডেমিৰ এয়া সৰ্বোচ্চ সন্মান’।
উল্লেখ্য যে অকাডেমিৰ এই সৰ্বোচ্চ সন্মান পোৱা শইকীয়া হ’ল অসমৰ চতুৰ্থজন ব্যক্তি। শইকীয়াৰ পূৰ্বে এই বিৰল সন্মানৰ অধিকাৰী হৈছিল বাগ্মীবৰ নিলমণি ফুকন(১৯৭৩), চৈয়দ আব্দুল মালিক(১৯৯৯) আৰু নিলমণি ফুকন(২০০২)।
আনহাতে ড০ শইকীয়াৰ চুটি গল্প সংকলন ‘আন্ধাৰত নিজৰ মুখ’ৰ বাবে ১৯৯৭ চনতে তেওঁ সাহিত্য অকাডেমি বঁটা লাভ কৰিছিল। ইয়াৰ উপৰি এইগৰাকী বিশিষ্ট সাহিত্যিকে বহুতো বঁটা তথা সন্মান পাবলৈ সক্ষম হৈছে।
উল্লেখযোগ্য যে ভাৰতবৰ্ষৰ সংবিধানস্বীকৃত ভাষাসমূহৰ ভিতৰত বিভিন্ন ৰাজ্যৰ পৰা নিজ নিজ ভাষাৰ জৰিয়তে সাহিত্য ক্ষেত্ৰখনলৈ নিৰন্তৰভাৱে আগবঢ়োৱা অনবদ্য অৱদানৰ ভিত্তিত অকাডেমিয়ে এখন সমিতিৰ জৰিয়তে নিৰ্বাচন কৰি ১৯৬৮ চনৰ পৰা এই সন্মান প্ৰদান কৰি আহিছে।
