গুৱাহাটী বিশ্ববিদ্যালয়ৰ লগতে ৰাজ্যৰ আন দুখন বিশ্ববিদ্যালয়তো নতুন উপাচাৰ্য নিযুক্তি দিয়া হৈছে। ৰাজভৱনৰ বিশেষ বাচনি সমিতিৰ অনুমোদন সাপেক্ষে উপাচাৰ্যৰ নিযুক্তি সম্পন্ন হৈছে।
গুৱাহাটী বিশ্ববিদ্যালয়ত ড০ ননীগোপাল মহন্তক উপাচাৰ্য হিচাপে নিযুক্তিৰ প্ৰস্তাৱত ৰাজভৱনে অনুমোদন জনাইছে। মুখ্যমন্ত্ৰীৰ ঘনিষ্ঠ হিচাপে পৰিচিত ড০ ননীগোপাল মহন্ত হ’ব গুৱাহাটী বিশ্ববিদ্যালয়ৰ পৰৱৰ্তী উপাচাৰ্য।
ড০ ননীগোপাল মহন্তই বৰ্তমানৰ উপাচাৰ্য প্ৰতাপজ্যোতি সন্দিকৈৰ স্থানত স্থলাভিষিক্ত হ’ব। ইয়াৰ পূৰ্বে গুৱাহাটী বিশ্ববিদ্যালয় ৰাজনীতি বিজ্ঞান বিভাগৰ অধ্যাপক তথা মুৰব্বী হিচাপে আছিল ড০ মহন্ত। তেওঁ মুখ্যমন্ত্ৰীৰ শিক্ষা উপদেষ্টাৰূপেও কাৰ্যনিৰ্বাহ কৰিছিল।
উল্লেখ্য যে ২০২১ চনত ড০ ননীগোপাল মহন্তক অসম চৰকাৰৰ শিক্ষা বিভাগৰ উপদেষ্টা হিচাপে নিযুক্তি দিয়া হৈছিল। যোৱা ফেব্ৰুৱাৰীত ড০ মহন্তই শিক্ষা উপদেষ্টা পদৰ পৰা পদত্যাগ কৰাৰ পিছৰে পৰা তেওঁ গুৱাহাটী বিশ্ববিদ্যালয়ৰ উপাচাৰ্য হ’ব বুলি চৰ্চা চলিছিল।
ইপিনে, বজালীৰ ভট্টদেৱ বিশ্ববিদ্যালয় আৰু হোজাইৰ ৰবীন্দ্ৰ নাথ ঠাকুৰ বিশ্ববিদ্যালয়ৰ নতুন উপাচাৰ্য নিযুক্তিৰ প্ৰস্তাৱতো ৰাজভৱনে অনুমোদন জনাইছে। সেই অনুসৰি, তেজপুৰ বিশ্ববিদ্যালয়ৰ অধ্যাপক ধনপতি ডেকাক বজালীৰ ভট্টদেৱ বিশ্ববিদ্যালয়ৰ উপাচাৰ্য হিচাপে নিযুক্তি দিয়া হৈছে।
আনহাতে, শিলচৰৰ অসম বিশ্ববিদ্যালয়ৰ অধ্যাপক মানৱেন্দ্ৰ দত্ত চৌধুৰীক হোজাইৰ ৰবীন্দ্ৰ নাথ ঠাকুৰ বিশ্ববিদ্যালয়ৰ নতুন উপাচাৰ্য নিযুক্তি দিয়া হৈছে।
