সংস্কৃত আচলতে এটা বৈজ্ঞানিক ভাষা আৰু আটাইতকৈ কম্পিউটাৰ অনুকূল ভাষা। আনকি নাছাৰ বিজ্ঞানীসকলেও ইয়াৰ ক’ডিং ক্ষমতাক স্বীকৃতি দিছে। শেহতীয়াকৈ দিল্লীৰ মুখ্যমন্ত্ৰী ৰেখা গুপ্তাই সংস্কৃত ভাষাৰ পুনৰুজ্জীৱনৰ সপক্ষে মন্তব্য কৰি এই দাবী উত্থাপন কৰিছে।
দিল্লী চৰকাৰ আৰু ‘সংস্কৃত ভাৰতী’ৰ সহযোগত ২৩ এপ্ৰিলৰ পৰা আৰম্ভ হোৱা সংস্কৃত শিক্ষা পদক্ষেপৰ সামৰণি অনুষ্ঠান হয়। দেওবাৰে তালৈ গৈছিল দিল্লীৰ মুখ্যমন্ত্ৰীগৰাকী। তাত সংস্কৃত ভাষাৰ কথা কওঁতে তেওঁ কয়, “ভাৰতৰ গৌৰৱময় ইতিহাস সংস্কৃতত লিখা হৈছে। আমাৰ সংস্কৃতি ইয়াত লিপিবদ্ধ হৈ আছে। পৃথিৱীৰ ৬০ খনতকৈও অধিক বিশ্ববিদ্যালয়ত সংস্কৃত ভাষাৰ পাঠদান কৰা হয়। মই কিছু গৱেষণা কৰি গম পালোঁ যে নাছাৰ বিজ্ঞানীসকলেও ইয়াৰ ক‘ডিং ক্ষমতাক স্বীকৃতি দি ইয়াৰ ওপৰত গৱেষণা পত্ৰ লিখিছে। এই ভাষাটোৱেই আটাইতকৈ কম্পিউটাৰ অনুকূল ভাষা।”
ৰেখা গুপ্তাই লগতে উল্লেখ কৰে যে সংস্কৃত হৈছে ভাৰতীয় সংস্কৃতিৰ ভেটি। তেওঁ কয়, “প্ৰতিখন ৰাজ্যৰ নিজস্ব মাতৃভাষা আছে। কিন্তু বাস্তৱত সংস্কৃতহে আমাৰ মাতৃভাষা। কাৰণ প্ৰতিটো ভাষা সংস্কৃতৰ পৰাই আহিছে। হিন্দী, মাৰাঠী, বাংলা, সিন্ধী, মালয়ালম — এই সকলোবোৰ সংস্কৃতৰ শাখা।”
ৰেখা গুপ্তাই আৰু কয়, “ভাৰত যদি বিশ্বগুৰু হ‘ব বিচাৰে, তেন্তে আমি সংস্কৃতৰ জৰিয়তে গভীৰ জ্ঞান আহৰণ কৰাটো প্ৰয়োজন। এইটোৱেই সেই ভাষা যিয়ে এসময়ত আমাৰ বিজ্ঞান, ব্যৱসায় আৰু সংস্কৃতিক পথ প্ৰদৰ্শন কৰিছিল।”
ছচিয়েল মিডিয়াত মুখ্যমন্ত্ৰীৰ এই মন্তব্যক বহু লোকে সমালোচনা কৰিছে। এই প্ৰসংগত তেওঁ ১৯৮৫ চনত ৰিক ব্রিগছে ৰচনা কৰা ‘সংস্কৃত আৰু কৃত্রিম বুদ্ধিমত্তাত জ্ঞান প্রতিনিধিত্ব’ নামৰ গৱেষণা পত্ৰখনৰ কথা উল্লেখ কৰে৷ তেওঁৰ মতে, সেই গৱেষণা পত্ৰখনত সংস্কৃতৰ ব্যাখ্যা কৃত্ৰিম বুদ্ধিমত্তাৰে বৰ্তমানৰ সময়ৰ লগত খাপ খোৱাকৈ কৰা হৈছিল।
আনকি মুখ্যমন্ত্ৰী ৰেখা গুপ্তাই দাবী কৰে যে দিল্লীৰ বিদ্যালয়ত শিশুসকলৰ সংস্কৃত অধ্যয়নত অধিক গুৰুত্ব দিয়া হ’ব।
