সমগ্ৰ দেশৰ লগতে অসমতো আজি ৰাজ্যুজুৰি বিভিন্ন কাৰ্য্যসূচীৰ মাজেৰে জাতিৰ পিতা মহামানৱ মহাত্মা গান্ধীৰ ডেৰশ বছৰীয়া জয়ন্তী উদযাপন কৰা হৈছে।
প্ৰতিবছৰে ২ অক্টোবৰৰ দিনটোত অহিংসা নীতিৰ পূজাৰী মহামানৱ মহাত্মা গান্ধীক স্মৰণ কৰি গান্ধী জয়ন্তী উদযাপন কৰি অহা হৈছে।
মহাপৰাক্ৰমী ইংৰাজৰ বিৰুদ্ধে ভাৰত বৰ্ষক অহিংস নীতিৰে স্বাধীনতা সংগ্ৰাম কৰিবলৈ শিকোৱা মহাত্মা গান্ধীৰ অৱদান স্বাধীন ভাৰতৰ ক্ষেত্ৰত সৰ্বশ্ৰেষ্ঠ।
ভাৰতৰ লগতে বিশ্বৰ অন্য দেশেও মহাত্মা গান্ধীৰ অহিংস নীতিৰ স্বাধীনতা সংগ্ৰামক সুকীয়া মৰ্যদা দি আহিছে।
চলিত বৰ্ষৰ ৰাষ্ট্ৰসংঘৰ সাধাৰণ পৰিষদৰ বৈঠকত বাংলাদেশ, কোৰিয়া, আফ্ৰিকাৰ বিভিন্ন দেশৰ ৰাষ্ট্ৰপ্ৰধানে মহাত্মা গান্ধীৰ নীতি, আদৰ্শক তেওঁলোকৰ দেশেও আদৰ্শ হিচাপে গ্ৰহণ কৰি আহিছে বুলি মন্তব্য কৰে।
স্বাধীনতা সংগ্ৰামৰ সময়ত চাৰিবাৰ অসম ভ্ৰমণলৈ অহা মহাত্মা গান্ধীৰ ব্যক্তিত্বই অসমীয়া মানুহক নতুন আশাৰ আলোকেৰে প্ৰজ্বলিত কৰি তুলিছিল।
অহিংস নীতি, স্বচ্ছতা, মানৱীয়তা, স্বদেশী নীতি আদিৰ ক্ষেত্ৰত মহাত্মাৰ দৰ্শনে ভাৰতীয় ঐতিহ্যক বহন কৰি আহিছে যদিও বৰ্তমান সময়ত দেশত বৃদ্ধি পাই অহা হিংসা, অমানবীয় কাৰ্য্যকলাপ আদিয়ে গান্ধীৰ আদৰ্শক নিজৰ দেশতে মৃত্যুৰ মুখলৈ ঠেলি দিয়া পৰিলক্ষিত হৈছে।
মহাত্মা গান্ধীৰ ১৫০ বছৰীয়া জন্মজয়ন্তীত ভাৰত বৰ্ষই এবাৰ ব্যৱহাৰ্য্য প্লাষ্টিক বৰ্জন কৰি বিশ্বৰ আগত পুনৰবাৰ ভাৰতীয় উদাৰ সভ্যতাৰ উদাহৰণ দাঙি ধৰাৰ চেষ্টা কৰিছে।
