ৰাজ্যৰ কৃষি আৰু উদ্যান শস্য বিভাগৰ উদ্যোগত আৰু অসম কৃষি বিশ্ববিদ্যালয়ৰ বিশেষ সহযোগত বোকাখাতত ২১ জানুৱাৰীৰ পৰা অনুষ্ঠিত হোৱা ৰাষ্ট্ৰীয় কৃষি আৰু উদ্যান শস্যৰ প্ৰদৰ্শনীৰ শনিবাৰে সামৰণি পৰে ৷
তিনিদিনীয়া এই ৰাষ্ট্ৰীয় প্ৰদৰ্শনীত দেশ-বিদেশৰ বহু অতিথি, কৃষি বিশেষজ্ঞ আৰু ৰাজ্যৰ বিভিন্ন প্ৰান্তৰ পৰা অহা প্ৰগতিশীল কৃষকে অংশগ্ৰহণ কৰে ৷
প্ৰদৰ্শনীৰ অন্তিম দিনা বোকাখাতৰ প্ৰদৰ্শনী থলীত সুসজ্জিত মণ্ডপত কৃষি যান্ত্ৰিককৰণ আৰু পৰিমিত কৃষি, কৃষি মুল্যায়ন আৰু পৰিচালনা আৰু বৈজ্ঞানিক পদ্ধতিত গাহৰি পালন আৰু এন্ট্ৰাপ্ৰিনয়ৰশ্বিপ ডেভিলপমেন্ট বিষয়ত এলানি প্ৰশিক্ষণ অনুষ্ঠিত হয় ৷
মেকাডনিয়াৰ উচ্চ পদস্থ বিষয়া নেহাট ইমিনি, ইন্দোনেচিয়াৰ সচিব এলী উলিয়ান্তি, ভুটানৰ কনচ্যুল জেনেৰেল ফুব চেৰিয়ে অংশগ্ৰহণ কৰা অনুষ্ঠানটোত সমল ব্যক্তি হিচাবে উপস্থিত থাকে অসম কৃষি বিশ্ববিদ্যলয়ৰ অধ্যাপক মানস বৰুৱা,পঙ্কজ বৰুৱা আৰু ড০ অনন্ত শইকীয়া ৷
প্ৰশিক্ষণৰ শেষলৈ বিয়লি প্ৰদৰ্শনী থলীৰ মুল মণ্ডপত অনুষ্ঠিত হয় প্ৰদৰ্শনীৰ অংশ গ্ৰহণকাৰী সকলৰ মাজত আয়োজিত প্ৰতিযোগিতাৰ বঁটা বিজয়ী সকলক বঁটা প্ৰদান কৰে ৷
এই লানি প্ৰতিযোগিতাত শ্ৰেষ্ঠ প্ৰদৰ্শনৰ বাবে তিতাবৰৰ কৃষক বিপিন লাহনক, শ্ৰেষ্ঠ প্ৰতিযোগিতামুলক উৎপাদনৰ বাবে বোকাখাত এগ্ৰ’কোম্পানীক, শ্ৰেষ্ঠ উদ্ভাৱনী দক্ষতাৰ বাবে সৰুপথাৰৰ অমৰেন্দ্ৰ চন্দ্ৰ পাল, শ্ৰেষ্ঠ বিপনিৰ বাবে কাৰ্বি আংলং স্বায়ত্ব শাসিত পৰিষদ কৃষি বিভাগক, শ্ৰেষ্ঠ বিভাগীয় বিপনিৰ বাবে অসমৰ পশু কল্যাণ আৰু পশু চিকিৎসা বিভাগক, শ্ৰেষ্ঠ জিলা বিপনি হিচাবে গোলাঘাট জিলাৰ কৃষি বিভাগক, শ্ৰেষ্ঠ নাৰ্চাৰীৰ বাবে শিমলুগুৰিৰ সেউজবন নাৰ্চাৰীক আৰু শ্ৰেষ্ঠ কৃষি যন্ত্ৰ আৰু কৃষি সঁজুলিৰ বিপনিৰ বাবে জালুকবাৰীৰ কুমাৰ ইঞ্জিনিয়াৰিঙক বঁটা প্ৰদান কৰা হয় ৷
ইয়াৰ উপৰিও এই অনুষ্ঠানৰ লগত সংগতি ৰাখি আয়োজন কৰা নৰ্থ ইষ্ট এগ্ৰি আইডিয়া চেলেঞ্জ ২০২১ বঁটাও প্ৰদান কৰে ৷ এই শিতানত প্ৰথম পুৰস্কাৰ ড০ ৰাজশেখৰ সাপকটাক, দ্বিতীয় পুৰস্কাৰ ৰিমঝিম বৰুৱাক আৰু তৃতীয় পুৰস্কাৰ প্ৰনৱ জ্যোতি পাৱেলক প্ৰদান কৰা হয় ৷
