বিগত বৰ্ষসমূহৰ দৰে এইবাৰো গুৱাহাটীত অনুষ্ঠিত হ’ব ৰাষ্ট্ৰীয় শিশু নাট্য সমাৰোহ। গুৱাহাটী শিশু নাট্য বিদ্যালয়ৰ উদ্যোগত অনুষ্ঠিত হ’বলগীয়া সপ্তম বাৰ্ষিক শিশু নাট সমাৰোহ খনি অহা ১০ ডিচেম্বৰৰ পৰা ১৩ ডিচেম্বৰলৈকে চাৰিদিনীয়া কাৰ্য্যসূচীৰে অনুষ্ঠিত হ’ব।
ৰাষ্ট্ৰীয় নাট্য বিদ্যালয়কে মুখ্য কৰি দেশৰ বিভিন্ন ৰাজ্যৰ ৮ খন নাটক মঞ্চস্থ কৰা হ’ব বুলি গুৱাহাটী প্ৰেছ ক্লাবত আয়োজিত এক সংবাদমেল যোগে জানিবলৈ দিয়ে গুৱাহাটী নাট্য বিদ্যালয়ৰ আৰ ভি এছ পি বৰ্ণালী সিং ডেকাই।
শ্ৰীমন্ত শংকৰদেৱ কলাক্ষেত্ৰৰ শ্ৰী শ্ৰী মাধৱদেব আন্তঃৰাষ্ট্ৰীয় প্ৰেক্ষাগৃহত অনুষ্ঠিত হ’বলগীয়া এই নাট্য মহোৎসৱখনিৰ প্ৰথম দিনা অৰ্থ্যাৎ ১০ ডিচেম্বৰত গুৱাহাটী শিশু নাট্য বিদ্যালয়ৰ নিজস্ব প্ৰযোজনাত তথা মানিক ৰয়ৰ পৰিচালনাৰে মঞ্চস্থ কৰা হ’ব ‘স্মাৰ্টফোন’ শীৰ্ষক নাটকখন।
গুজৰাটৰ লা-প’লা টাই থিয়েটাৰ গ্ৰুপৰ সংলাপ বিহীন নাটক ‘লা-প’লা’ ৰে উক্ত নাট্য মহোৎসৱখনি উদ্বোধন কৰা হ’ব বুলি সংবাদমেলত উদ্যোক্তাসকলে জানিবলৈ দিয়ে।
একেদৰে মহোৎসৱৰ দ্বিতীয় দিনা পাটনাৰ কিলকাৰি গ্ৰুপৰ ‘তত্বচান’ আৰু উত্তৰ লখিমপুৰৰ কিশলয় গোষ্ঠীৰ ‘সম্বলপুৰৰ ৰজা’ উক্ত নাট দুখন মঞ্চস্থ কৰা হ’ব।
ইয়াৰোপৰি ১২ ডিচেম্বৰৰ দিনা টাই কোম্পানী ৰাষ্ট্ৰীয় নাট্য বিদ্যালয়ৰ ‘এক্ৰছ দ্য ছি’ আৰু সৰভোগৰ ভাও এণ্ড এক্টৰছ ৱৰ্লড গ্ৰুপৰ ‘সঁচা সপোন’ নামৰ নাটক দুখন মঞ্চস্থ কৰা হ’ব।
মহোৎসৱৰ শেষৰ দিনা ফৰিদাবাদ হাৰিয়ানাৰ মুখা মুখম মঞ্চ গ্ৰুপৰ ‘ৱহ কাগজ কি কস্তি-ৱহ বাৰিছ কি পানী’ নাটেৰে উক্ত শিশু নাট মহোৎসৱখনিৰ সামৰণি পৰিব।
১০ ডিচেম্বৰৰ দিনা সন্ধিয়া ৫:৩০ বজাৰ পৰা আৰম্ভ হ’ব উক্ত শিশু নাট মহোৎসৱ। আৰম্ভণি অনুষ্ঠানত উক্ত মহোৎসৱৰ লগত সংগতি ৰাখি এখন স্মৰণিকাও উন্মোচন কৰা হ’ব বুলি উদ্যোক্তাসকলে জানিবলৈ দিয়ে।
