নুমলীগড় শােধনাগাৰৰ উদ্যোগত অসম বায়’ ৰিফাইনাৰী প্রাইভেট লিমিটেড (ABRPL) নামেৰে গঠন হােৱা ৰাজ্যৰ প্ৰথমটো জৈৱ শােধনাগাৰে নুমলীগড়ত বলবৎ থকা ন’ ডেভিলপমেন্ট জ’ন আইন উলংঘা কৰা বুলি ৰাষ্ট্ৰীয় সেউজ প্ৰধিকৰণত বোকাখাতৰ ৰোহিত চৌধুৰীয়ে তৰা গোচৰৰ আবেদন খাৰিজ কৰিছে ৰাষ্ট্ৰীয় সেউজ প্ৰধিকৰণে৷
প্রধান মন্ত্রী নৰেন্দ্র মােদীয়ে আধাৰশিলা স্থাপন কৰা এই জৈৱ শােধনাগাৰটোৰ ক্ষেত্ৰত কেন্দ্রীয় চৰকাৰৰ পৰিৱেশ আৰু বন মন্ত্ৰ্যালয়ে ২০১৭ বর্ষৰ ৮ নৱেম্বৰত পাৰিপার্শ্বিক অনুমােদন কৰিছিল।
কিন্তু এই পাৰিপার্শ্বিক অনুমােদনক প্রত্যাহান জনাই শোধনাগাৰটো বন্ধ কৰাৰ বাবে ৰােহিত চৌধুৰী নামৰ এগৰাকী যুৱকে ৰাষ্ট্ৰীয় সেউজ ন্যায়াধিকৰণত তৰা এক গােচৰক লৈ জিলাখনত যথেষ্ট প্রতিক্রিয়াৰ সৃষ্টি হৈছিল।
২০১৮ বর্ষৰ ৫ ফেব্রুৱাৰিত তৰা এই গােচৰ সন্দর্ভত যােৱা ১৪ আগষ্টত অন্তিম শুনানি গ্রহণ কৰি প্ৰাধিকৰণৰ ন্যায়ধীশ আদৰ্শ কুমাৰ গোয়েল, এছ পি ৱাংডি আৰু নাগিন নন্দাক লৈ গঠিত তিনিজনীয়া বিচাৰপীঠে ন’ ডেভেলপমেন্ট জ’নত এই জৈৱিক শোধনাগাৰ স্থাপন কৰাৰ লগতে বায়ু প্ৰদূষণ আৰু জল প্রদূষণ সৃষ্টি কৰাকে ধৰি ৰোহিত চৌধুৰীয়ে উত্থাপন কৰা মুঠ ১৫ টাৰো অধিক অভিযােগ নস্যাৎ কৰি নুমলীগড়ৰ জৈৱিক শোধনাগাৰৰ সপক্ষে ঐতিহাসিক ৰায়দান কৰে।
এই ৰায় দানত সেউজ প্ৰধিকৰণে এই কথাও স্পষ্ট কৰি দিয়ে যে ১৯৯৬ চনত কেন্দ্রীয় চৰকাৰে নুমলীগড় শোধনাগাৰৰ ১৫ কিলােমিটাৰ ব্যাসার্ধ এলেকাক সামৰি ঘােষণা কৰা ন’ ডেভলপমেন্ট জ’ন এলেকাত প্ৰদূষণ আৰু কেন্দ্রীয় পৰিৱেশ আৰু বন মন্ত্র্যালয়ৰ অনুমােদন সাপেক্ষে নিশ্চিতভাৱে উদ্যোগ স্থাপন কৰিব পাৰিব আৰু এই অঞ্চলটো উদ্যোগ স্থাপনৰ বাবে নিষিদ্ধ অঞ্চল নহয় বৰং নিয়ন্ত্ৰিত অঞ্চল বুলিহে গণ্য কৰা বুলি সেউজ প্ৰাধিকৰণে তাৎপর্যপূর্ণ মন্তব্য কৰে।
নুমলীগড় শোধনাগাৰৰ জৈৱ শোধনাগাৰ স্থাপনৰ আৰম্ভণিতেই ৰাষ্ট্ৰীয় সেউজ প্ৰাধিকৰণত তৰা এই গােচৰটো যােৱা তিনিটা বছৰে কেইবাটাও শুনানিৰ অন্তত ১৪ আগষ্টত চূড়ান্ত ৰায়দানেৰে সামৰণি পৰে৷
সেউজ প্ৰাধিকৰণে প্রদান কৰা এই ৰায়দানক জাতীয়তাবাদী যুৱ-ছাত্র পৰিষদৰ কেন্দ্রীয় সমিতিৰ সাংগঠনিক সম্পাদক বিপুল বৰা, নুমলীগড় শােধনাগাৰ ঠিকাদাৰ সংস্থাৰ সভাপতি অনুপ ভাগৱতী, গােলাঘাট সম্মিলিত নাগৰিক মঞ্চৰ মুখ্য সম্পাদক দিগন্ত কুমাৰ ভূঞা, অসম ক্রিকেট এছ’চিয়েশ্যনৰ উপ সভাপতি পৰীক্ষিত দত্ত, নুমলীগড় অইল ৰিফাইনেৰী টেংকাৰ এছ’চিয়েশ্যনৰ সম্পাদক ভাস্কৰ জ্যোতি গােঁহাই, আটছা (স্বতন্ত্র)ৰ মুখ্য উপদেষ্টা নুৰুল আলী, মৰঙী প্রেছ ক্লাব সভাপতি হেমন্ত শইকীয়া, ঐক্যসেনা অসমৰ গােলাঘাট জিলা সমিতিৰ সভাপতি তৌফিক আলীকে ধৰি বিভিন্ন অনুষ্ঠান প্রতিষ্ঠানে আদৰণি জনাইছে।
উল্লেখ্য যে কেন্দ্রীয় চৰকাৰৰ হাইড্র’কার্বন ভিজন-২ৰ অধীনত মুঠ ১৭৫০ কোটি ব্যয়ৰে নিৰ্মাণ হ’ব লগা এই জৈৱ শোধনাগাৰ কার্যক্ষম হৈ উঠিলে ৫ লাখ মেট্রিক টন বাঁহ প্ৰতি বছৰে ব্যৱহৃত হ’ব বুলি জানিব পৰা গৈছে।
নুমলীগড়ৰ এই জৈৱ শোধনাগাৰটো অহা ২০২১ বর্ষত উৎপাদন ক্ষম হৈ উঠিব বুলি শােধনাগাৰৰ সূত্রৰ পৰা জানিব পৰা গৈছে।
