দেশৰ বিভিন্ন প্ৰান্তৰ লগতে আজি বােকাখাতটো বিভিন্ন কাৰ্যসূচীৰে ৰাষ্ট্রীয় ভােটাৰ দিৱস উদযাপন কৰা হয়।
এই উপলক্ষ্যে বােকাখাতৰ পুৱতি সাহিত্য সভা ভৱনত মহকুমাধিপতি বিপুল দাসৰ পৌৰহিত্যত অনুষ্ঠিত সভাত মহকুমাটোৰ কেইবাগৰাকীও জ্যেষ্ঠ নাগৰিক, সাংবাদিক, ছাত্র-ছাত্রী, বি এল অ আৰু বিষয়া-কমচাৰী সকল উপস্থিত থাকে।
অনুষ্ঠানত মহকুমাধিপতি বিপুল দাসে দিয়া ভাষণ প্ৰসংগত ৰাষ্ট্রীয় ভােটাৰ দিৱসৰ তাৎপৰ্য বাখ্যা কৰে।
সভাত কেইবাগৰাকীও বক্তাই ভােটাৰ দিৱসৰ বিভিন্ন দিশ পর্যালােচনা কৰি এখন সুস্থ আৰু নিকা চৰকাৰ গঠনত নিজৰ ভােটাধিকাৰ সাব্যস্ত কৰিবলৈ সকলােকে আহ্বান জনায়।
ৰাষ্ট্ৰীয় ভােটাৰ দিৱসৰ লগত সংগতি ৰাখি বােকাখাত নির্বাচনী বিভাগৰ তৰফৰ পৰা ৯২ নং বােকাখাত বিধানসভা সমষ্টিৰ চাৰি গৰাকী শতায়ু গৰকা জেষ্ঠ্য ভােটাৰ ক্রমে ৫৯নং ভােটদান কেন্দ্রৰ ধুলে পেগু, ১০৪ নং ভােটদান কেন্দ্রৰ গােলাপী তাঁতী আৰু গাদুমী মৰাং, ৫১ নং ভােটদান কেন্দ্রৰ বলোৰাম হাজৰিকাক নিজ বাসগৃহত সম্বর্ধনা জনায়।
ৰাষ্ট্রীয় ভােটাৰ দিৱস উপলক্ষ্যে বোকাখাতৰ জে ডি এচ জি মহাবিদ্যালয়ত বােকাখাত নিৰ্বাচনী কাৰ্যালয়ৰ উদ্যোগত ছাত্র-ছাত্রীসকলৰ মাজত কুইজ প্রতিযােগিতাও অনুষ্ঠিত কৰা হয়।
উক্ত কুইজ প্রতিযােগিতাত প্রথম, দ্বিতীয় আৰু তৃতীয় স্থান লাভ কৰে ক্রমে জ্ঞান মার্গ একাডেমিৰ ৰোহিত ৰাৱট আৰু টিনা দাস, চন্দ্ৰনাথ বেজবৰুৱা মহাবিদ্যালয়ৰ বিপ্লৱ ছেত্রী আৰু আশীষ শর্মা, বেষ্ট একাডেমিৰ গৌৰৱ হাজৰিকা আৰু স্নেহা বৰা বাঢ়ৈ।
উল্লেখযােগ্য যে সভাৰ আৰম্ভণিতে মহকুমা নিৰ্বাচনী বিভাগৰ উদ্যোগত ভােটাৰ সজাগতাৰ বাবে এখনি চুটি নাট প্রদর্শন কৰাৰ লগতে বােকাখাতৰ বিভিন্ন এলেকাত বাটৰ নাট আৰু ফ্লেছ ম’ব ডান্স প্রদর্শন কৰা হয়।
ইফালে আজি বোকাখাত পৌৰসভাৰ উদ্যোগত বোকাখাত নগৰ এলেকাত প্ৰধান মন্ত্ৰী আৱাস যোজনাৰ অধীনৰ আৱাস গৃহ লাভ কৰি নিমাৰ্ণ কাৰ্য্য সম্পূৰ্ণ কৰা মুঠ চাৰিটা ঘৰত “গৃহ প্ৰৱেশ সমাৰোহ” অনুস্থিত হয় ৷
এই অনুষ্ঠানত বোকাখাত মহকুমাৰ মহকুমাধিপতি বিপুল দাস, বোকাখাত পৌৰসভাৰ কাৰ্য্যবাহী বিষয়া মানসজ্যোতি নাথ, প্ৰধান মন্ত্রী আৱাস যোজনাৰ গোলাঘাট জিলা প্ৰকল্প পৰিচালক শংকৰ প্ৰসাদ বিশ্বাস আৰু পৌৰসভাৰ বিভাগীয় কৰ্মচাৰীৰ উপস্থিত থাকে ।
