মনিপুৰত প্ৰচণ্ড ধুমুহা বতাহৰ ফলত সংঘটিত হোৱা নাও দুৰ্ঘটনাত সন্ধানহীন হৈ থকা তিনিগৰাকী লোকক উদ্ধাৰৰ বাবে নৌ সেনা বাহিনীৰ এটা উদ্ধাৰকাৰী দল ৰাজ্যখনত উপস্থিত হৈছে। বাৰজনীয়া দলটোত দুগৰাকী নাবিককে ধৰি দুগৰাকী হাইড্ৰ’গ্ৰাফাৰ আছে।
মঙলবাৰে, ভাৰতীয় বায়ু সেনা বাহিনীৰ বিশেষ বিমানযোগে বিশাখাপট্টনমৰ পৰা উদ্ধাৰ অভিযান চলোৱাৰ বাবে উপস্থিত হয় দলটো।
আনহাতে, উদ্ধাৰকাৰী দলটোৰ বিষয়া এগৰাকীয়ে প্ৰকাশ কৰা মতে দলটোৱে অত্যাধুনিক চ’নাৰ স্কেনাৰ যন্ত্ৰৰ লগতে প্ৰয়োজনীয় সা-সৰঞ্জামেৰে সৈতে উপস্থিত হৈছে। দলটোৱে এন ডি আৰ এফ আৰু স্থানীয় উদ্ধাৰকাৰী দলৰ সৈতে একেলগে উদ্ধাৰ অভিযান চলাব।
উল্লেখযোগ্য যে, দেওবাৰে প্ৰায় ৪ মান বজাত মনিপুৰত অহা প্ৰচণ্ড ধুমুহা, বৰষুণৰ ফলত কামজোং জিলাৰ মাপিথেল হ্ৰদত দুখন নাও দুৰ্ঘটনাৰ মুখত পৰিছিল।
নাও দুখনত ১২ জন ভ্ৰমণকাৰী আছিল। নাওঁৰীয়াই ৯ জন লোকক দুৰ্ঘটনাৰ কবলৰ পৰা উদ্ধাৰ কৰিবলৈ সক্ষম হৈছে যদিও এতিয়াও এচ ৰাজীব (৩৫), এচ ৰোমেন (২৯) আৰু এন ৰানী (১৯) নামৰ তিনিগৰাকী লোক সন্ধানহীন হৈ আছে।
দেওবাৰৰ অহা প্ৰচণ্ড ধুমুহাজাকত ৰাজ্যখনৰ ঘৰ-দুৱাৰ, বিদ্যালয়কে ধৰি ব্যক্তিগত আৰু ৰাজহুৱা সা-সম্পত্তিৰ বিস্তৰ ক্ষয়-ক্ষতি হয়।
