এনডিএফবিৰ (প্ৰগ্ৰেছিভ) সৈতে কেন্দ্ৰ চৰকাৰৰ শান্তি চুক্তি স্বাক্ষৰিত হোৱাৰ ১৩ বছৰ পাৰ পাছতো সংগঠনটোৰ নেতাসকল নিশ্চিত যে এখন পৃথক বড়োলেণ্ড নিৰ্মাণ হ’ব।
ওদালগুৰিৰ সাপেখাটী ডেজিগনেটেট শিবিৰত ৩ অক্টোবৰত এনডিএফবিৰ ৩২ সংখ্যক প্ৰতিষ্ঠা দিৱসৰ দিনা প্ৰায় ৭০০০ লোকৰ বৃহৎ সমাৱেশত পুনৰ পৃথক ৰাজ্যৰ দাবী তুলিলে সংগঠনটোৱে।
এনডিএফবিৰ (প্ৰগ্ৰেছিভ) সভাপতি ধীৰেন বড়োৱে সংগঠনৰ পতাকা উত্তোলন কৰি কাৰ্যসূচী মুকলি কৰে। সংগঠনটোৰ সাধাৰণ সম্পাদক গোবিন্দ বসুমতাৰী ওৰফে বি স্বৰ্গীয়াৰীয়ে অভিওযগ কৰে যে বৰ্তমানৰ বিজেপি চৰকাৰে বড়োসকলক বিশ্বাসঘাটকতা কৰিছে।
তেওঁ আৰু কয় যে চৰকাৰে তেওঁলোকৰ দাবীৰ সপক্ষে কেবিনেটক সিদ্ধান্ত গ্ৰহণ নকৰা পৰ্যন্ত কাৰো মিছা প্ৰতিশ্ৰুতিত তেওঁলোক আৰু ভোল নাযায়।
নেশ্যনেল ফেডাৰেশ্যন অব নিউ ষ্টেটছৰ সাধাৰণ সম্পাদক এছ ছানিয়ালে কৈছে যে বড়োসকলৰ সুদীৰ্ঘ সময়ৰ সংগ্ৰামে এদিন সুফল আনিব। তেওঁ কয় যে চৰকাৰে বড়ো সম্প্ৰদায়ক বঞ্চিত কৰাই নহয়, তেওঁলোকক বিশ্বাসঘাটকতাও কৰিছে।
আবছুৰ সভাপতি প্ৰমোদ বড়োইই কৈছে যে চৰকাৰে ক্ষুদ্ৰ জনগোষ্ঠীসমূহে তেওঁলোকৰ ভাষা, পৰম্পৰা আৰু সংস্কৃতিক ৰক্ষা কৰাৰ বাবে কৰি অহা সংগ্ৰামক উদগনি দিয়াৰ বাবে ৰণনীতিমূলক উপায় উলিয়াব লাগে।
এনডিএফবিৰ (প্ৰগ্ৰেছিভ)সহকাৰী প্ৰচাৰ সম্পাদক বি বড়োছাই উদ্বোধনী ভাষণ ৰাখে। প্ৰাক্তন সাংসদ তথা ইউপিপিএলৰ সভাপতি উৰখাও ব্ৰহ্ম, ইণ্ডিজেনাছ পীপলছ ফ্ৰণ্ট অব ত্ৰিপুৰাৰ উপ সভাপতি অন্ত দেববৰ্মা আদিয়েও সভাত ভাষণ প্ৰদান কৰে।
এই সভাতেই সংগঠনটোৰ মুখপত্ৰ ‘উদাংশ্ৰি’ উন্মোচন কৰা হয়। উনওচন কৰে বড়ো সাহিত্য একাডেমী বঁটা বিজয়ী নবীৱ মাল্লা বড়োৱে।
উল্লেখ্য যে ১৯৮৬ চনত ‘সাৰ্বভৌম বড়োলেণ্ড’ৰ দাবীত এনডিএফবিৰ (প্ৰগ্ৰেছিভ)জন্ম হৈছিল। ১৯ বছৰ যোৰা সশস্ত্ৰ সংগ্ৰামৰ পাছত ২০০৫ চনত যুদ্ধ বিৰতি ঘোষণা কৰিছিল আৰু কেন্দ্ৰৰ সৈতে আলোচনাত বহিছিল।
