মিজোৰামৰ স্বাস্থ্যমন্ত্ৰী লালৰিনপুইয়ে বৃহস্পতিবাৰে বিধানসভাত অৱগত কৰে যে বিগত চাৰে পাঁচ বছৰত মিজোৰামত একুইয়াৰ্ড ইমিউন’ডেফিচিয়েন্সি চিণ্ড্ৰম (এইডছ)ৰ সৈতে জড়িত জটিলতাৰ বাবে প্ৰায় ৩ হাজাৰ লোকৰ মৃত্যু হৈছে।
বিৰোধী মিজো নেচনেল ফ্ৰণ্টৰ বিধায়ক কে লালডাউংলিয়ানাৰ প্ৰশ্নৰ উত্তৰত মন্ত্ৰীগৰাকীয়ে কয় যে ২০২০ চনৰ পৰা ২০২৫ চনৰ জুলাইৰ ভিতৰত এইডছত আক্ৰান্ত হৈ ২৯৯৬ জন লোকৰ মৃত্যু হৈছে।
২০২৩ চনত সৰ্বাধিক মৃত্যু হোৱা লোকৰ সংখ্যা ৬৩২জন, তাৰ পিছতে ২০২৪ চনত ৫৬১ জন আৰু চলিত বৰ্ষৰ জুলাই মাহলৈকে ২৯৫ জন লোকৰ মৃত্যু হোৱা বুলি জানিব পৰা গৈছে।
একে সময়ছোৱাতে ২০২৫ চনত ৬১১ জন নতুনকৈ ধৰা পৰা ৰোগীকে ধৰি ১১,০৩২ জন ব্যক্তি এইচ আই ভি পজিটিভ পোৱা গৈছে। বৰ্তমান মিজোৰামত ১৯২৮ জন লোক এইডছ ৰোগত আক্ৰান্ত হৈ আছে। আনহাতে এইচ আই ভি ৰোগত আক্ৰান্ত লোকৰ মুঠ সংখ্যা ১৯,৮৩৭ জন।
ইয়াৰে ১৮,৬৯৪ জনে এণ্টি-ৰেট্ৰ’ভাইৰেল থেৰাপী (এ আৰ টি) গ্ৰহণ কৰি আছে, আৰু ১১৪৩ জন চিকিৎসাৰ সুবিধা গ্ৰহণ কৰা নাই।
মিজোৰাম ষ্টেট এইডছ কণ্ট্ৰল ছ’চাইটি (MSACS)ৰ তথ্য অনুসৰি ১৯৯০ চনৰ অক্টোবৰত প্ৰথম এইচ আই ভি পজিটিভ ৰোগী ধৰা পৰাৰ পৰা এইডছ ৰোগত আক্ৰান্ত হৈ ৫,৬৩২ জন লোকৰ মৃত্যু হৈছে। মুঠতে আজিলৈকে ৩২,৫৪৪ জন এইচ আই ভি পজিটিভ ৰোগী ধৰা পৰিছে, যাৰ ফলত মিজোৰাম দেশৰ ভিতৰতে সৰ্বাধিক এইচ আই ভি/এইডছৰ প্ৰাদুৰ্ভাৱ থকা ৰাজ্য হিচাপে পৰিগণিত হৈছে।
মুখ্যমন্ত্ৰী লালডুহোমাই পূৰ্বে কৈছিল যে ২০২৪–২৫ বিত্তীয় বৰ্ষত ধৰা পৰা এইচ আই ভি পজিটিভ ৰোগীৰ ৯৭.৩৮ শতাংশই হয় অসুৰক্ষিত যৌন সম্পৰ্কৰ জৰিয়তে নহয় ড্ৰাগছ সেৱনকাৰীক বেজী আৰু চিৰিঞ্জ শ্বেয়াৰ কৰাৰ জৰিয়তে সংক্ৰমিত হয়।
ইয়াৰে যৌন সংক্ৰমিত ৬৮.১৩ শতাংশ হোৱাৰ বিপৰীতে ২৯.২৫ শতাংশ ড্ৰাগছ সেৱনৰ সৈতে জড়িত।
