নগাঁও জিলাৰ চামগুৰিত আজি এক হৃদয় বিদাৰক ঘটনা সংঘটিত হয়। চামগুৰি আৰক্ষী থানাৰ অন্তৰ্গত কনুৱামাৰী পকী দলঙৰ তলত এটি মৃত নৱজাতকৰ মৃতদেহ উদ্ধাৰ হয়।
প্ৰথম অৱস্থাত স্থানীয় ৰাইজে আজি দিনৰ প্ৰায় ২ বজাত এটা বজাৰ কৰা মোনাত কাপোৰেৰে মেৰিয়া থোৱা অৱস্থাত এটি সদ্যোজাত কন্যা সন্তান প্ৰত্যক্ষ কৰে।
লগে লগে স্থানীয় ৰাইজে ঘটনা সন্দৰ্ভত আৰক্ষীক অৱগত কৰাত চামগুৰি আৰক্ষী থানাৰ ভাৰপ্ৰাপ্ত আৰক্ষী বিষয়া জীৱন পি মাৰাকসহ আৰক্ষীৰ লোক ঘটনাস্থলীত উপস্থিতহৈ কন্যা সন্তানটিক মৃত অৱস্থাত উদ্ধাৰ কৰে।
সম্প্ৰতি মৃত কন্যা সন্তানটি নগাঁও অসামৰিক চিকিৎসালয়লৈ মৰণোত্তৰ পৰীক্ষাৰ বাবে প্ৰেৰণ কৰাৰ লগতে সন্তানটিৰ প্ৰকৃত পিতৃ-মাতৃৰ সন্ধানত আৰক্ষীয়ে অনুসন্ধান অব্যাহত ৰাখিছে বুলি আৰক্ষী সূত্ৰে জানিব পৰা গৈছে।
