আমেৰিকা যুক্তৰাষ্ট্ৰৰ গৱেষণা প্ৰতিষ্ঠান ইনষ্টিটিউট অৱ হেল্থ মেট্ৰিক্স এণ্ড ইভেল্যুৱেচন (আইএইচএমই)ৰ পূৰ্বানুমান অনুসৰি, ২০২৩ চনত চীনত কৰোনাৰ ফলত ১০ লাখৰো অধিক লোকৰ মৃত্যু হ’ব পাৰে।
আইএইচএমই-ৰ সঞ্চালক ক্ৰিষ্টোফাৰ মুৰেয়ে কয় যে পূৰ্বানুমান অনুসৰি, চীনত কৰোনাৰ সংক্ৰমণ অহা বছৰৰ ১ এপ্ৰিলৰ ভিতৰত সৰ্বোচ্চ স্তৰত উপনীত হ’ব। বছৰটোৰ সেই সময়লৈকে চীনৰ মুঠ জনসংখ্যাৰ এক-তৃতীয়াংশ ভাইৰাছৰ দ্বাৰা সংক্ৰমিত হ’ব। আৰু কৰোনাত মৃত্যুৰ সংখ্যা ৩ লাখ ২২ হাজাৰ স্পৰ্শ কৰিব।
লগতে পঢ়ক: চাপত নতশিৰ! সমালোচনাৰ সন্মুখীন হৈ সাংবাদিকসকলৰ টুইটাৰ একাউণ্ট ঘূৰাই দিলে এলন মাস্কে
চীন চৰকাৰে ডিচেম্বৰত হোৱা প্ৰতিবাদৰ মাজতে কৰোনাভাইৰাছৰ নিষেধাজ্ঞা উঠাই লৈছিল। তেতিয়াৰ পৰা দেশত সংক্ৰমণ বৃদ্ধি হৈ আহিছে। অহা মাহত চীনত নতুন চন্দ্ৰ বৰ্ষ উদযাপন কৰা হ’ব। আশংকা কৰা হৈছে যে উৎসৱৰ সময়তে দেশৰ ১৪০ কোটি জনসংখ্যালৈ কৰোনা বিয়পিব পাৰে।
ক্ৰিষ্টোফাৰ মুৰেয়ে কয় যে চীনৰ শূন্য-কোভিড নীতি ভাইৰাছৰ আগৰ প্ৰকাৰবোৰ প্ৰতিৰোধ কৰাত কাৰ্যকৰী হ’ব পাৰে। কিন্ত শক্তিশালী অ’মিক্ৰন প্ৰকাৰ প্ৰতিৰোধ কৰাটো দেশখনৰ বাবে একপ্ৰকাৰ অসম্ভৱ হ’ব।
চীনৰ স্বাস্থ্য কৰ্তৃপক্ষই কৰোনাৰ নিষেধাজ্ঞা উঠাই লোৱাৰ পিছত এতিয়ালৈকে কৰোনাত কোনো মৃত্যুৰ খবৰ দিয়া নাই। দেশখনে শেষবাৰৰ বাবে ৩ ডিচেম্বৰত ভাইৰাছৰ ফলত মৃত্যুৰ খবৰ দিছিল। চীনৰ কৰোনাত এতিয়ালৈকে মুঠ মৃত্যুৰ সংখ্যা হৈছে ৫,২৩৫ জন।
বহু বিশেষজ্ঞই পুনৰ কয় যে অহা বছৰ জানুৱাৰীত চীনত কৰোনা সংক্ৰমণ সৰ্বোচ্চ স্তৰত উপনীত হ’ব। এই সময়ত দেশৰ প্ৰায় ৬০ শতাংশ লোক কৰোনাৰ দ্বাৰা সংক্ৰমিত হ’ব পাৰে।
ইফালে, হংকং বিশ্ববিদ্যালয়ৰ দ্বাৰা প্ৰদান কৰা তথ্য অনুসৰি, ২০২২ চনৰ ডিচেম্বৰৰ পৰা ২০২৩ চনৰ জানুৱাৰী মাহৰ ভিতৰত চীনৰ বিভিন্ন প্ৰদেশৰ পৰা কৰোনাৰ নিষেধাজ্ঞা উঠাই লোৱা হ’ব। এই সময়ছোৱাত দেশৰ প্ৰতি ১০ লাখ লোকৰ ভিতৰত ৬৮৪ জন লোকৰ কৰোনাত মৃত্যু ঘটিব পাৰে।
