নিউয়ৰ্কে নিযুক্তি দিলে প্ৰথম গৰাকী মহিলা আৰক্ষী প্ৰধান
নিউয়ৰ্কে দেশৰ সৰ্ববৃহৎ আৰক্ষী বাহিনীৰ মুৰব্বী হিচাপে প্ৰথমবাৰৰ বাবে মহিলা আৰক্ষী প্ৰধান নিযুক্ত কৰিছে। আমেৰিকা যুক্তৰাষ্ট্ৰৰ সংবাদ মাধ্যমে আজি এই খবৰ প্ৰকাশ কৰিছে।
সংবাদ মাধ্যমত প্ৰকাশিত খবৰ অনুসৰি কিচাণ্ট চেৱেলক চহৰখনৰ আৰক্ষী প্ৰধান হিচাপে নিযুক্তি দিয়া হৈছে। উল্লেখ্য যে এই পদত অধিষ্ঠিত চেৱেল তৃতীয় কৃষ্ণাঙ্গ ব্যক্তি হ’ব।
আৰক্ষী প্ৰধান হিচাপে নিযুক্ত হোৱাৰ পিছত চেৱেলে এক বৃহৎ প্ৰতিবন্ধকতা অতিক্ৰম কৰিব লাগিব। কিয়নো চহৰখনৰ আৰক্ষী বিভাগ হিংসাত্মক, বৰ্ণবাদী আৰু দুৰ্নীতিগ্ৰস্ত বিষয়াসকলক পদবীত আশ্ৰয় দিয়াৰ অভিযোগৰ সন্মুখীন হৈছে।
এনে অৱস্থাত চেৱেলে আৰক্ষী বিভাগৰ ওপৰত জনসাধাৰণৰ বিশ্বাস পুনৰ স্থাপনৰ বাবে শক্তিশালী বাধা অতিক্ৰম কৰিব লাগিব।
চেৱেলে ডেম’ক্ৰেটিক মেয়ৰ হিচাপে নিৰ্বাচিত হোৱা এৰিক এডামছৰ উত্তৰাধিকাৰী হিচাপে এই পদত অধিষ্ঠিত হ’ব।
এডামছে দ্য নিউয়ৰ্ক পোষ্টক কয়, “চেৱেল এজন প্ৰমাণিত অপৰাধ বিৰোধী যুঁজাৰু। তেওঁৰ অভিজ্ঞতা আৰু বুদ্ধিমত্তা আছে আৰু ইয়াৰ দ্বাৰা নিউয়ৰ্কৰ জনতাৰ প্ৰয়োজনীয় সুৰক্ষা আৰু তেওঁলোকৰ প্ৰাপ্য ন্যায় দুয়োটা প্ৰদান কৰিব পাৰিব।”
“চীফ চেৱেলক আমি আমেৰিকাৰ দ্বিতীয় আটাইতকৈ কঠিন আৰক্ষীৰ কামলৈ স্বাগতম জনাইছো।” চহৰখনৰ মুখ্য পুলিচ ইউনিয়ন, পুলিচ বেনিভেলেণ্ট এছ’চিয়েচনৰ মুৰব্বী পেট্ৰিক লিঞ্চে কয়।
চেৱেল বৰ্তমান নিউয়ৰ্ক চহৰৰ পূবৰ নাচাউ কাউণ্টিত মুখ্য অনুসন্ধানকাৰী হিচাপে কাৰ্যনিৰ্বাহ কৰি আছে।
সংবাদ মাধ্যমৰ আগত চেৱেলে কয়, “আমি সম্পূৰ্ণৰূপে হিংসাত্মক অপৰাধৰ ওপৰত গুৰুত্ব আৰোপ কৰিছো। হিংসাত্মক অপৰাধ হৈছে এক নম্বৰ প্ৰাথমিকতা।”