প্রবল বৰষুণৰ ফলত ৰে’লপথ ক্ষতিগ্ৰস্ত হোৱাৰ বাবে বাতিল কৰা ইণ্টাৰচিটি এক্সপ্ৰেছৰ সেৱা পুনৰ শুকুৰবাৰৰ পৰা আৰম্ভ হ’ব বুলি উত্তৰ-পূৱ সীমান্ত ৰে’লৱে উল্লেখ কৰে।
উত্তৰ-পূব সীমান্ত ৰে’লৱেৰ বিভাগীয় কৰ্তৃপক্ষই টুইটাৰযোগে বৃহস্পতিবাৰে এই কথা প্ৰকাশ কৰে।
অতিপাত বৃষ্টিপাতৰ বাবে আলিপুৰদুৱাৰ ডিভিজনৰ অন্তৰ্গত জোৰাই আৰু কামাখ্যাগুৰি ৰে’ল ষ্টেশ্যনৰ মাজৰ ৰে’লপথ বেয়াকৈ ক্ষতিগ্ৰস্ত হয়।
বুধবাৰে উত্তৰ-পূব সীমান্ত ৰে’লৱে নিউ কোচবিহাৰ আৰু বঙাইগাঁৱৰ মাজত থকা ৰে’ল আলি ক্ষতিগ্ৰস্ত হোৱা বুলি উল্লেখ কৰিছিল যাৰ বাবে বহু যাত্ৰীবাহী ৰে’লগাড়ী বিভিন্ন ষ্টেশ্যনত আবদ্ধ হৈ থাকিবলগীয়া হৈছিল।
Braving very heavy rains and surging flood waters, workers have worked day and night to restore the damaged railway track between Jorai and Kamakhyaguri of Alipurduar division. Mail express trains have started running normally and intercity passengers to resume from tomorrow pic.twitter.com/yuKwgS5r7h
— N. F. Railway (@RailNf) July 25, 2019
বৰষুণৰ বাবে জোৰাই আৰু কামাখ্যাগুৰিৰ মাজত ক্ষতিগ্ৰস্ত হোৱা ৰে’ল পথছোৱাৰ মেৰামতিৰ কাম উত্তৰ-পূব সীমান্ত ৰে’লৱে দিনে-নিশাই কৰি আছে।
ক্ষতিগ্ৰস্ত ৰে’লপথৰ মেৰামতিৰ কামৰ অগ্ৰগতি সম্বন্ধে উত্তৰ-পূব সীমান্ত ৰে’লৱে এনেদৰে টুইট কৰে-
‘‘প্ৰবল বৰষুণ আৰু বানপানীৰ মাজতে আমাৰ কৰ্মচাৰীসকলে জোৰাই আৰু কামাখ্যাগুৰিৰ মাজৰ ভগ্ন ৰে’লপথছোৱা মেৰামতিৰ কাম দিনে নিশাই কৰি আছে’’।
উত্তৰ-পূব সীমান্ত ৰে’লৱেৰ তৰফৰ পৰা মেইল এক্সপ্ৰেছ ৰে’লগাড়ীসমূহ স্বাভাৱিকভাৱে চলিবলৈ আৰম্ভ কৰিছে বুলি উল্লেখ কৰাৰ লগতে ইণ্টাৰচিটি এক্সপ্ৰেছ ৰে’লগাড়ীসমূহ শুকুৰবাৰৰ পৰা চলাচল কৰিব বুলি কয়।
ৰে’লপথ ক্ষতিগ্ৰস্ত হোৱা বাবে উত্তৰ-পূব সীমান্ত ৰে’লৱে বৃহস্পতিবাৰে ১০ খন ৰে’লৰ চলাচল বাতিল কৰিছিল।
বাতিল কৰা ৰে’লসমূহৰ ভিতৰত বেছিসংখ্যক ৰে’ল আলিপুৰদুৱাৰ ডিভিজনৰ অন্তৰ্গত অসমত চলাচল কৰা ফাষ্ট যাত্ৰীবাহী, ডেমু স্পেচিয়েল আৰু ইণ্টাৰচিটি এক্সপ্ৰেছ।