গোৰখনাথ মন্দিৰ আক্ৰমণৰ ঘটনাত অভিযুক্ত আহমেদ মুৰ্তাজা আব্বাচীক নেশ্যনেল ইনভেষ্টিগেশ্যন এজেন্সি (নিয়া)ৰ এখন বিশেষ আদালতে মৃত্যুদণ্ডৰ ৰায় প্ৰদান কৰিছে।
যোৱা বছৰ এপ্ৰিলত মুৰ্তাজাই উত্তৰ প্ৰদেশৰ গোৰখনাথ মন্দিৰত নিয়োজিত নিৰাপত্তাকৰ্মীসকলক লক্ষ্য কৰি আক্ৰমণ চলাইছিল। ঘটনাটোত দুজন আৰক্ষী গুৰুতৰভাৱে আহত হৈছিল। উত্তৰ প্ৰদেশ চৰকাৰে এই আক্ৰমণক “সন্ত্ৰাসবাদী আক্ৰমণ” বুলি অভিহিত কৰিছিল।
আইআইটিৰ স্নাতক আব্বাচীয়ে কৈছিল যে মুছলমানসকলৰ ওপৰত চলি থকা “অত্যাচাৰে” তেওঁৰ ক্ষোভৰ সৃষ্টি কৰিছিল। সেইকাৰণে এই আক্ৰমণ চলোৱা হৈছিল। আব্বাচীয়ে এইটোও দাবী কৰিছিল যে তেওঁ আক্ৰমণৰ বাবে বহু আগতে প্ৰস্তুতি চলাইছিল।
সন্ত্ৰাসবাদ বিৰোধী গোটে ঘটনাটোৰ তদন্ত কৰে। আব্বাচীক দুদিন আগতে এটিএছ আদালতে দোষী সাব্যস্ত কৰিছিল। সোমবাৰে মৃত্যুদণ্ডৰ শাস্তি প্ৰদান কৰা হয়।
উত্তৰ প্ৰদেশ আৰক্ষীৰ আইন-শৃংখলা শাখাৰ এডিজি প্ৰশান্ত কুমাৰে কয় যে আদালতে ভাৰতীয় দণ্ডবিধিৰ ১২১ ধাৰাৰ অধীনত মুৰ্তাজাক মৃত্যুদণ্ড প্ৰদান কৰিছে। আৰক্ষীক আক্ৰমণ কৰাৰ বাবে মুৰ্তাজাক ভাৰতীয় দণ্ডবিধিৰ ৩০৭ ধাৰাৰ অধীনত আজীৱন কাৰাদণ্ড দিয়া হৈছিল। এইবাৰ তেওঁক মৃত্যুদণ্ড দিয়া হৈছে।
উত্তৰ প্ৰদেশ আৰক্ষীয়ে দাবী কৰিছিল যে মুৰ্তাজা ইছলামিক ষ্টেট (আইএছ) সন্ত্ৰাসবাদী গোটৰ সৈতে জড়িত আছিল। তেওঁ উগ্ৰপন্থী দলটোৰ সদস্যসকলক আৰ্থিক সাহায্যও আগবঢ়াইছিল। আব্বাচীয়ে জেৰাৰ সময়ত এইদৰে স্বীকাৰ কৰা বুলি কোৱা হৈছে।
