মুখ্যমন্ত্ৰীৰ উপস্থিতিত অস্ত্ৰ সম্বৰণ কৰাৰ পিছত প্ৰথমবাৰৰ বাবে বাক্সা জিলাৰ ভাৰত-ভূটান সীমান্তৰ বিনোৱাপুৰত শনিবাৰে আবেলি এক জুৰুৰী সভাত মিলিত হয় বিটিচিৰ চাৰিওখন জিলাৰ NLFB উগ্ৰপন্থী সংগঠনৰ প্ৰাক্তন কেডাৰসকল ।
তামুলপুৰৰ বিধায়ক ইমানুৱেল মুছাহাৰীৰ সৈতে আলোচনাত মিলিত হল উগ্ৰপন্ত্ৰী সংগঠনটোৰ প্ৰাক্তন অধ্যক্ষ অমৰজিৎ পাল, মুখ্য সেনাধ্যক্ষ কৃষ্ণ পোদ্দাৰ, বাপ্পী দাস সহ দুই শতাধিকৰো অধিক প্ৰাক্তন কেডাৰে।
অস্ত্ৰ সম্বৰণ কৰি এইসকল কেডাৰে মূল সুঁতিলৈ ঘূৰি আহিছে যদিও তেওঁলোকৰ দাবী সমূহ পুৰণ নকৰাত আৰু তেওঁলোকৰ জাতিটোৰ নাগৰিকত্ব সমস্যা, D ভোটাৰৰ সমস্যা, মাটি-বাৰীৰ সমস্যা সমাধান নোহোৱাত ক্ষোভ প্ৰকাশ কৰে আৰু স্থানীয় বিধায়কৰ জৰিয়তে কেন্দ্ৰ আৰু ৰাজ্য চৰকাৰক এই বিষয়ে অৱগত কৰে।
উল্লেখ যে BTAD ৰ বহু কেইটা উগ্ৰবাদী সংগঠনে অস্ত্ৰ সম্বৰণ কৰাৰ পিছত ইতিমধ্যে নায্য দাবী সমূহ পূৰণ কৰিবলৈ সক্ষম হৈছে যদিও NLFB সদস্য সকলৰ এতিয়ালৈ দাবী সমূহ পূৰণ নকৰাত আৰু চৰকাৰৰ প্ৰতিশ্ৰুতি মৰ্মে কোনো সুবিধা কৰি নিদিয়াত উপায়ন্তৰ হৈ পৰিছে এইসকল প্ৰাক্তন কেডাৰ।
শীঘ্ৰে ৰাজ্য চৰকাৰ আৰু BTC ৰ মুখ্য কাৰ্য্যবাহীৰ সৈতে আলোচনাত মিলিত হৈ কেডাৰসকলৰ সমস্যাৰ সমাধানৰ প্ৰতিশ্ৰুতি দিলে স্থানীয় বিধায়ক ইমানুৱেল মোছাহাৰীয়ে।
