কোনে অপহৰণ কৰিলে অ’এনজিচিৰ তিনি কৰ্মচাৰীক? বৰ্তমানলৈকে কোনো তথ্য নাই আৰক্ষী, অ’এনজিচি কৰ্তৃপক্ষৰ হাতত। আনহাতে কোনো সন্ত্ৰাসবাদী সংগঠনেও যোগাযোগ কৰা নাই অ’এনজিচিৰ লগত।
কোলাত চাৰিমহীয়া কেঁচুৱা লৈ অপহৃত ৰিতুল শইকীয়াৰ পত্নীয়ে শীঘ্ৰে তেওঁৰ স্বামীক মুকলি কৰি দিবলৈ অপহৰণকাৰীলৈ কাতৰ অনুৰোধ জনাইছে।
মঙললবাৰে বিয়লি ৪ টা মান বজাত পত্নীক ফোন কৰি জনাইছিল ডিউটিলৈ যাবলৈ ওলাইছো বুলি। তাৰ পিছত বুধবাৰে দিনৰ ১১ মান বজাতহে ৰিতুলৰ পত্নীক জনোৱা হৈছিল বুলি সাংবাদিকৰ আগত প্ৰকাশ কৰে পত্নী শতাব্দী হাজৰিকাই।
আনহাতে, ঘৰৰ একমাত্ৰ সন্তান মোহিনী মোহন গগৈক মুকলি কৰি দিবলৈ অনুৰোধ জনায় তেওঁৰ পত্নীয়ে। মঙলবাৰে নিশা প্ৰায় ১১ বজাত পত্নীৰ সৈতে কথা পাতিছিল মোহিনী মোহন গগৈয়ে।
ইপিনে দুয়োগৰাকী কৰ্মচাৰী শিৱসাগৰৰ অ’এনজিচিৰ আৱাসগৃহত আছিল। বুধবাৰে অ’এনজিচিৰ অসম সম্পদৰ ইডিৰ সহিতে বহু বিষয়া উপস্থিত হয় অপহৃত ৰিতুল শইকীয়া আৰু মোহিনী মোহন গগৈৰ আৱাসগৃত।
শীঘ্ৰে তিনিও গৰাকী কৰ্মচাৰীক মুকলি কৰি আনিবলৈ অ’এনজিচিয়ে সকলো প্ৰকাৰৰ চেষ্টা কৰিব বুলি পৰিয়াল দুটাক আশ্বাস প্ৰদান কৰে।
উল্লেখ্য যে মঙলবাৰে নিশা প্ৰায় ১.৩০ বজাত পাঁচজনীয়া অস্ত্ৰধাৰী দল এটাই লাকুৱা তৈলক্ষেত্ৰৰ এটা ৰিগৰ পৰা কৰ্মৰত অৱস্থাত থকা অ’এনজিচিৰ তিনি অসমীয়া কৰ্মচাৰীক অপহৰণ কৰি নিছিল।
বুধবাৰে অসম আৰক্ষীয়ে অসম নাগালেণ্ড সীমান্তত অপহৰণকাৰীৰ বিৰুদ্ধে তীব্ৰ অভিযান চলাইছে যদিও কোনো শুংসূত্ৰ লাভ কৰা নাই বুলি জানিব পৰা গৈছে।
