“মাদ্ৰাছাত জেহাদীৰ লগত কোনো সম্পৰ্ক নাই, ইয়াত জেহাদৰ প্ৰশিক্ষণ দিয়া নহয়। মাদ্ৰাছাত কোৰাণ আৰু হাদিজৰ শিক্ষা দিয়া হয়। লগতে দেশপ্ৰেম আৰু মানৱতাৰ শিক্ষা দিয়া হয়।”
নৰ্থ ইষ্ট নাওলৈ প্ৰেৰণ কৰা এক ভিডিওত এইদৰে মন্তব্য কৰে সদৌ অসম মাদ্ৰাছা ছাত্ৰ সন্থাৰ সভাপতি মৌলানা ওৱাহিদুজামানে।
উল্লেখ্য যে কেইদিন মান পুৰ্বে বৰপেটাত নিষিদ্ধ ঘোষিত সংগঠন জে এম বিৰ সদস্য গ্ৰেপ্তাৰ হয় যিসকলে এসময়ত মাদ্ৰাছাত পঢ়া-শুনা কৰিছিল।
উক্ত ঘটনাক লৈ সম্প্ৰতি সমগ্ৰ অসমত বিতৰ্ক সৃষ্টি হৈছে। এই বিতৰ্কৰ মাজতে প্ৰতিক্ৰিয়া প্ৰকাশ কৰিছে আমছাই।
“সন্ত্ৰাসবাদৰ কাৰ্যকলাপত জড়িত থকা বাবেহে তেওঁলোকক গ্ৰেপ্তাৰ কৰা হৈছে,” এইদৰে মন্তব্য কৰে আমছাৰ সভাপতিগৰাকীয়ে।
তেওঁ কয় “তেনেক্ষেত্ৰত অসমৰ সমগ্ৰ মাদ্ৰাছাসমূহক টাৰ্গেট কৰি লোৱাটো দুৰ্ভাগ্যজনক আৰু ষড়যন্ত্ৰমূলক। অসমৰ বহু কলেজত অধ্যয়ন কৰা যুৱক আলফা নাইবা মাওবাদীত যোগদান কৰিছিল, তেতিয়া তেনে কোনো প্ৰশ্ন উত্থাপন কৰা হোৱা নাছিল।”
আমছাৰ সভাপতিৰ প্ৰশ্ন “তেনেক্ষেত্ৰত মাদ্ৰাছা শিক্ষা ব্যৱস্থাক কিয় বৈষম্যমূলক আচৰণ কৰা হৈছে?”
তদুপৰি, অসমৰ মাদ্ৰাছা সমূহৰ ছাত্ৰ-ছাত্ৰীৰ মূল শ্লোগান দেশপ্ৰেম ইমামৰ অংগ বুলি উল্লেখ কৰাৰ উপৰিও তেওঁ কয় যে কোৰাণত লিখা আছে এজন নিৰীহ লোকক হত্যা কৰা মানে সমগ্ৰ মানৱ জাতিক হত্যা কৰা।
আনহাতে, চৰকাৰলৈ আহ্বান জনাই সভাপতিগৰাকীয়ে কয় যে অসম চৰকাৰৰ হাতত মাদ্ৰাছাত সন্ত্ৰাসবাদৰ প্ৰশিক্ষণৰ কিবা তথ্য থাকিলে সোনকালে ৰাজহুৱা কৰক। তেতিয়া সেইসমূহ মাদ্ৰাছা বন্ধ কৰি দিয়াৰ ব্যৱস্থা কৰা হ’ব বুলি তেওঁ স্পষ্ট কৰি দিয়ে।
মাদ্ৰাছাত কোনো ধৰণৰ জেহাদী প্ৰশিক্ষণ দিয়াৰ কথা অস্বীকাৰ কৰি মাদ্ৰাছাকলৈ গভীৰ ষড়যন্ত্ৰ চলি আছে বুলি মন্তব্য কৰে সদৌ অসম মাদ্ৰাছা ছাত্ৰ সংস্থাৰ সভাপতি মৌঃ ওৱাহিদুজ্জামানে।
তেওঁ লগতে ‘জে এম বি’ তথা ‘আইচিছ’ৰ নিচিনা নিকৃষ্ট সংগঠন সমূহক সকীয়নি দি কয় যে মাদ্ৰাছা শিক্ষাক লৈ কৰা ষড়যন্ত্ৰ সহ্য কৰা নহ’ব।
