এক চৰম লজ্জাজনক কাণ্ড সংঘটিত হৈছে নয়ডাত। বিকৃত যৌন কামনা চৰিতাৰ্থ কৰি গ্ৰেটাৰ নয়ডাৰ এগৰাকী ব্যক্তিয়ে পথৰ কাষৰ এটি অঘৰী কুকুৰক ধৰি নি নিজ কোঠাৰ ভিতৰত ধৰ্ষণ কৰাৰ অভিযোগ উত্থাপন হৈছে।
এই জঘন্য কাণ্ড চুবুৰীয়াই দেখা পোৱাৰ পিছতে অভিযুক্ত ব্যক্তিগৰাকীয়ে অট্টালিকাটোৰ তৃতীয় মহলাৰ পৰা তললৈ দলিয়াই দিয়ে বুলিও জানিব পৰা গৈছে।
এই চৰম লজ্জাজনক কাণ্ড পোহৰলৈ অহাৰ পিছতে সৃষ্টি হৈছে তীব্ৰ চাঞ্চল্যৰ। অভিযুক্ত ব্যক্তিগৰাকীক সোণবীৰ বুলি চিনাক্ত কৰা হৈছে। মথুৰাৰ এই ব্যক্তিগৰাকীয়ে গ্ৰেটাৰ নয়ডাৰ এটা ভাড়াঘৰত বাস কৰিছিল।
বুধবাৰে গভীৰ নিশা তেওঁ পথৰ কাষৰ পৰা এটা মাইকী কুকুৰক ধৰি দ্বিতীয় মহলাৰ নিজৰ কোঠালৈ লৈ যায় আৰু কুকুৰটোক বান্ধি লৈ পিছত ধৰ্ষণ কৰে বুলি অভিযোগ উঠিছে।
ইফালে তেওঁৰ কাষতে বাস কৰা এহাল দম্পতীয়ে এই কাণ্ড প্ৰত্যক্ষ কৰে আৰু লগে লগে অট্টালিকাটোৰ এলাৰ্ম বজাই দিয়ে। ইয়াৰ পিছতে অট্টালিকাত থকা লোকসকল সেই স্থানত উপস্থিত হয়।
এই জনসমাগম দেখা পাই সোণবীৰে কুকুৰটোক ছাদলৈ লৈ যায় আৰু তৃতীয় মহলাৰ পৰা তললৈ নিক্ষেপ কৰে। আনহাতে এই সমগ্ৰ ঘটনা সন্দৰ্ভত চুবুৰীয়া লোকসকলে আৰক্ষীক খবৰ দিয়ে।
আৰক্ষীয়ে এই তথ্য লাভ কৰাৰ লগে লগে ঘটনাস্থলীত উপস্থিত হয় আৰু সোণবীৰক গ্ৰেপ্তাৰ কৰি পশু নিৰ্যাতনৰ সৈতে জড়িত প্ৰাসংগিক ধাৰাত গোচৰ তৰি পিছত তেওঁক জেললৈ প্ৰেৰণ কৰে।
ইফালে এই বৰ্বৰ কাণ্ডৰ বলি হৈ গুৰুতৰভাৱে আহত হোৱা মাইকী কুকুৰটো বৰ্তমান চিকিৎসাধীন হৈ আছে বুলি জানিব পৰা গৈছে।
