বিজেপিৰ বিধায়ক ৰাজেন বৰঠাকুৰৰ অৱস্থা সংকটজনক; মৃত্যু হোৱা বুলি ফেইচবুকত পোষ্ট সতীৰ্থ বিধায়কৰ
চিকিৎসাধীন হৈ থকা বিজেপিৰ ৰঙাপাৰা সমষ্টিৰ বিধায়ক ৰাজেন বৰঠাকুৰৰ মৃত্যু হোৱা বুলি মিছা বাতৰিৰে আজি সন্ধিয়া ৬.২৫ বজাত ফেইচবুক পোষ্ট দিয়ে বিজেপিৰে সতীৰ্থ বিধায়ক নোমল মমিনে।
নিজৰ ফেইচবুক পোষ্টত মোমিনে এনেদৰে লিখে ”এইমাত্ৰ ৰঙাপাৰা সমষ্টিৰ বিধায়ক ৰাজেন বৰঠাকুৰৰ মৃত্যুৰ বাতৰি শুনি আচৰিত হৈছো। অসমে এজন ভাল ৰাজনৈতিক নেতা হেৰুৱালে। তেওঁৰ আত্মাই সদগতি লাভ কৰক।”
অলপতে অনুষ্ঠিত হোৱা উপ-নিৰ্বাচনত ৰঙাপাৰা বিধানসভা সমষ্টিৰ পৰা ৰাজেন বৰঠাকুৰে বিজেপিৰ প্ৰাৰ্থী হিচাপে বিজয়ী হৈ বিধানসভাত বিধায়ক হিচাপে শপত গ্ৰহণ কৰিছিল।
শ্বাস-প্ৰশ্বাসজনিত সংক্ৰমণত আক্ৰান্ত হোৱা ৰাজেন বৰঠাকুৰক তেজপুৰৰ টাইমছ হস্পাতালত ভৰ্তি কৰোৱা হৈছিল। বৰ্তমান বৰঠাকুৰৰ স্বাস্থ্যৰ অধিক অৱনতি ঘটাত ভেণ্টিলেটৰত ৰখা হৈছে।
অসমৰ দুই এটা সংবাদ মাধ্যমতো বিধায়ক গৰাকীৰ মৃত্যু হোৱা বুলি ভুলকৈ বাতৰি প্ৰচাৰ কৰা হৈছিল।
ৰঙাপাৰা বিধানসভা সমষ্টিৰ বিধায়ক পল্লৱ লোচন দাসে লোকসভালৈ নিৰ্বাচিত হোৱাৰ পাছতে খালী হোৱা আসনখনৰ বাবে অনুষ্ঠিত উপ-নিৰ্বাচনত প্ৰতিদ্বন্দ্বিতা আগবঢ়াই ৰাজেন বৰঠাকুৰ বিজয়ী হৈছিল।
বিজেপিৰ মুখপাত্ৰ নোমল মমিনৰ এনে দায়িত্বজ্ঞানহীন ফেইচবুক পোষ্টে কাৰ্য্যত দলটোৰ ভিতৰত তেওঁৰ স্থিতিক প্ৰমান কৰিছে।