যোৱা ৪ দিন ধৰি আৰক্ষীৰ জিম্মাত থকা বিতৰ্কিত RTI কৰ্মী দুলাল বৰাৰ বাসগৃহত আজি মহানগৰীৰ হাতীগাওঁ থানাৰ আৰক্ষীয়ে তালাচী চলায়।
আৰক্ষীৰ সূত্ৰই জনোৱা অনুসৰি খানাপাৰাৰ কইনাধৰাস্থিত বাসগৃহটোত তালাচী অভিযানৰ সময়ত আৰক্ষীয়ে বহুতো গোপনীয় আৰু আপত্তিজনক নথি-পত্ৰ জব্দ কৰিছে, যিবোৰৰ মাজত বেংকৰ কিছু নথিও আছে।
কামৰূপ গ্ৰাম্যৰ যান-বাহন পৰিদৰ্শক নাইমুদ্দিন আহমেদক ৫ লাখ টকা দাবী কৰাৰ অভিযোগত আৰক্ষীয়ে যোৱা ৭ ডিচেম্বৰত দুলাল বৰাক গ্ৰেপ্তাৰ কৰিছিল।
আহমেদে দুলাল বৰাৰ বিৰুদ্ধে ব্লেকমেইলিঙৰ অভিযোগ আনি যোৱা ৪ ডিচেম্বৰত হাতীগাঁও থানাত এখন এজাহাৰ দিছিল।
লগতে পঢ়ক ধন দাবী কৰি গ্ৰেপ্তাৰ হ’ল বিতৰ্কিত আৰ টি আই কৰ্মী দুলাল বৰা
উক্ত গোচৰৰ ভিত্তিত গ্ৰেপ্তাৰ কৰি আদালতত হাজিৰ কৰোৱাৰ পিছত বিতৰ্কিত আৰ টি আই কৰ্মীজনক আদালতে ৫ দিনৰ আৰক্ষীৰ জিম্মাত দিয়ে।
উল্লেখযোগ্য যে দুলাল বৰাই আৰ টি আই আইন ব্যৱহাৰ কৰি সততে বিভিন্নজনৰ বিৰুদ্ধে দুৰ্নীতি, কেলেংকাৰিৰ তথ্য উদঙাই আহিছিল যদিও তেওঁ ইয়াক ব্লেকমেইলিঙৰ বাবেহে ব্যৱহাৰ কৰে বুলি দীৰ্ঘদিনৰ পৰা অভিযোগ আছিল।
তেওঁ সাধাৰণতে জনপ্ৰিয় আৰু ধনাঢ্য ৰাজনৈতিক নেতা, বিষয়া, আমোলা আদিক লক্ষ্য কৰি লয়।
আয়কৰ বিভাগৰ লোক লগত যোৱা বুলি আৰক্ষীয়ে স্বীকাৰ কৰা নাই যদিও, এটা সূত্ৰৰ মতে, অভিযানকাৰীয়ে বৰাৰ ঘৰৰ পৰা আয় কৰ সম্পৰ্কীয় খেলিমেলি থকাৰ সন্দেহ কৰিব পৰা নথি জব্দ কৰিছে।
