ব্লু-ডাৰ্ট নামৰ কাৰ্গো বিমানখনৰ সতে বিমান বন্দৰত ফটো উঠি চীনৰ পৰা ৫০ হেজাৰ পি-পি-ই-কিট অনা দেশৰ প্ৰথমখন ৰাজ্য বুলি সগৌৰৱে টুইট কৰা ঘটনাতো বিধানসভাৰ মজিয়াত মিছা আখ্যা দিলে বৰ্তমানৰ স্বাস্থ্য মন্ত্ৰী কেশৱ মহন্তই । এতেকে তেতিয়াৰ সেই ঘটনা ভূতৰ কাম আৰু আমাৰ ভ্ৰম আছিল বুলিয়েই ধৰি ললো । কিন্ত একেজন স্বাস্থ্য মন্ত্ৰীয়ে এসময়ত বহু বিৰ্তকিত জে-চি-বি ইণ্ড্ৰাষ্টিজ নামৰ প্ৰতিষ্ঠানটোকো এন-এইচ-এমৰ ফালৰ পৰা পি-পি-ই-কিট যোগানৰ কোনো অৰ্ডাৰ দিয়া হোৱা নাছিল বুলি বিধানসভাত লিখিতভাবে জানিবলৈ দিছে । প্ৰতিষ্ঠানটোৰ ঠিকনা ইণ্ডাষ্টিয়েল ইষ্ট্ৰেট ; ফৰ্থ বাইলেন ; গুৱাহাটী বুলি কোৱা হৈছে ; কিন্ত মালিকৰ নাম জ্ঞাত নহয় বুলিছে । তেন্তে যোৱা জুন মাহত দা ক্ৰছ কাৰেণ্ট আৰু দা ৱায়াৰ নামৰ পৰ্টেল দুটাই আৰ-টি-আইৰ জৰিয়তে এন-এইচ-এমৰ পৰা তথ্য সংগ্ৰহ কৰি জে-চি-বিয়ে অতিৰিক্ত মূল্যত পি-পি-ই-কিটৰ অৰ্ডাৰ পোৱা বুলি যি চাঞ্চল্যকৰ বাতৰি প্ৰচাৰ কৰিছিল আৰু তাকে লৈ দেশজোৰা আলোড়ন সৃষ্টি হোৱাই নহয় বিৰোধী দলবোৰ তদন্তৰ দাবীত সোচ্চাৰ হৈ পৰিছিল সেয়াও কি মিছা আছিল । সেই তথ্যপাতিৰ আধাৰতে সংবাদ মেল দিবলৈ গৈ দিল্লীৰ উপ মুখ্যমন্ত্ৰী ইতিমধ্যে ফৌজদাৰী গোচৰৰো সন্মুখীন হৈছে । মন্ত্ৰী মহন্তৰ তথ্য সচাঁ বুলি ধৰিলে যি দেখিছো পৰ্টেল দুটাকহে এতিয়া গৰিহনাৰে উপচাই দিব লাগিব । এন-এইচ-এমৰ পৰা সংগ্ৰহ কৰা তথ্যপাতিৰে তেওঁলোকে দেখোন জে-চি-বি কোম্পানীটোৰ মালিক হিচাপে মুখ্যমন্ত্ৰীৰ পত্মী আৰু কোনোবা ধানুকাকো সাঙুৰিছিল । অথচ মন্ত্ৰী মহন্তই বিধানসভাত দিয়া তথ্যমতে কোম্পানীটোৰ মালিকৰ নাম এন-এইচ-এমৰ জ্ঞাত নহয় । এনেস্থলত গোটেই ঘটনাতো এতিয়া ৰহস্যৰ মাজত সোমাই পৰিল। আৰ-টি-আই তথ্যৰ আধাৰত পৰ্টেল দুটাই জে-চি-বিয়ে অৰ্ডাৰমতে ৫ হেজাৰ পি-পি-ই-কিট যোগান ধৰিব নোৱাৰাৰ বাবে এন-এইচ-এমে ২০২০ চনৰ ৬ এপ্ৰিলত অৰ্ডাৰ বাতিল কৰা আৰু তাৰ পৰিবৰ্তে যোগান পোৱা ১৪৮৫ টা পি-পি-ই-কিট পৰৱৰ্তী সময়ত চি-এছ-আৰ শিতানত গ্ৰহন কৰা বুলি দেখুওৱা বুলিও বাতৰি প্ৰচাৰ কৰিছিল । কিন্ত বিধায়ক কমলাক্ষ দে পুৰকায়স্থৰ প্ৰশ্নৰ উত্তৰত মন্ত্ৰী মহন্তই দিয়া তথ্যই গোটেই কথাবোৰ ৰহস্যঘন কৰি পেলালে । এই ঘটনাটোও এতিয়া ভূতৰ কাৰবাৰ যেনহে লাগিল । পৰ্টেল দুটাক আৰ-টি-আইৰ উত্তৰত আগতে এন-এইচ-এমে যি লিখিত তথ্যপাতি দিছিল সেয়া মিছা আছিল নে মন্ত্ৰী মহন্তই দিয়া তথ্য মিছা সেই সন্দৰ্ভত পৰ্টেল দুটা নীৰৱ হৈ থকাৰ অৰ্থও বুজি পোৱা নাই । তেৰাসৱকো ভূতে লম্ভিলে নেকি !! আনহাতে সেই সময়ত বিষয়টো লৈ তদন্তৰ দাবীত সোচ্চাৰ হোৱা আনকি চি-বি-আই তদন্ত বিচাৰি প্ৰধানমন্ত্ৰীলৈ মেমোৰেণ্ডাম পঠোৱা বিৰোধী দলকেইটাও মৌন !
