গুৱাহাটীস্থিত এগৰাকী প্ৰতিষ্ঠিত ব্যৱসায়ী প্ৰাণজিৎ শইকীয়াৰ শনিবাৰে গুৱাহাটীত দেহাৱসান হয়। মৃত্যুৰ সময়ত তেওঁৰ বয়স আছিল ৬১ বছৰ।
পৰিয়ালৰ সূত্ৰই জানিবলৈ দিয়া মতে, বিপুল নামেৰে জনাজাত প্ৰয়াত প্ৰাণজিৎ শইকীয়া গুৱাহাটীত এখন বাহনত যাত্ৰা কৰি থকা অৱস্থাতে ষ্ট্ৰোকত আক্ৰান্ত হৈ বাগৰি পৰিছিল।
তৎকালীনভাৱে তেওঁক চহৰৰ নেমকেয়াৰ চিকিৎসালয়লৈ লৈ যোৱা হয় যদিও চিকিৎসকে তেওঁক মৃত বুলি ঘোষণা কৰে।
১৯৬১ চনৰ ২২ জুনত গুৱাহাটীত জন্মগ্ৰহণ কৰা প্ৰখ্যাত ব্যৱসায়ীগৰাকী তেওঁৰ জনহিতকৰ সামাজিক কাম-কাজৰ বাবেও জনাজাত আছিল।
গুৱাহাটীৰ বিভিন্ন মন্দিৰ আৰু অন্যান্য ধৰ্মীয় প্ৰতিষ্ঠান তথা উৎসৱলৈ পুঁজি দান কৰি তেওঁ ৰাইজৰ আস্থাভাজন হৈ পৰিছিল।
দিচপুৰৰ লগতে জাপৰিগোগ দুৰ্গা পূজা উদযাপন সমিতিকে ধৰি চহৰখনৰ বিভিন্ন অনুষ্ঠানৰ সৈতে জড়িত আছিল প্ৰয়াত শইকীয়া।
এফচিআই- ৰ এগৰাকী নামী ঠিকাদাৰ হিচাপে পৰিচিত প্ৰাণজিৎ শইকীয়া বামুণীময়দানস্থিত চহৰখনৰ আটাইতকৈ পুৰণি গাড়ী মেৰামতি কেন্দ্ৰ মন’ মটৰ ৱ’ৰ্কছ্ আৰু খ্ৰীষ্টান বস্তি অঞ্চলত অৱস্থিত শইকীয়া কমাৰ্চিয়েল কমপ্লেক্সৰ মালিক আছিল।
প্ৰয়াত প্ৰাণজিৎ শইকীয়াৰ অন্তিম সংস্কাৰ সোমবাৰে গুৱাহাটীৰ ভূতনাথ শ্মশানত সম্পন্ন কৰা হ’ব বুলি পৰিয়ালৰ লোকে জানিবলৈ দিছে।
