ৰন্ধন গেছৰ গ্ৰাহকসকলৰ সুবিধাৰ্থে ইণ্ডিয়ান অইলে কেইবাটাও পদক্ষেপ গ্ৰহণ কৰিছে।
ৰন্ধন গেছ শেষ হ’লে ৰিফিল বুকিং কৰিবলৈ এতিয়া ইণ্ডেনৰ IRVS-ত ফোন কৰাৰ প্ৰয়োজন নহয়।
নিজৰ পঞ্জীয়ন নম্বৰৰ পৰা 8454955555 লৈ এটা মিছ্ড কল দিলেই হয়। তদুপৰি, হোৱাটছএপৰ জৰিয়তেও LPG চিলিণ্ডাৰ বুকিং কৰিব পাৰি।
এইবাৰ ইণ্ডিয়ান অইলে আন এক সুবিধা আগবঢ়াইছে য’ত ৰন্ধন গেছৰ চিলিণ্ডাৰ কিনাৰ বাবে গ্ৰাহকৰ ঠিকনাৰ নথি দাখিল কৰাৰ প্ৰয়োজন নহয়।
সাধাৰণতে কোনোৱে এখন চহৰৰ পৰা আন এখন চহৰলৈ গ’লে প্ৰয়োজনীয় ৰন্ধন গেছৰ বাবে হাবাথুৰি খাবলগীয়া হয়। বিশেষকৈ ঠিকনাৰ নথিৰ ব্যৱস্থা কৰোতেই জ্বলাকলা খাবলগীয়া হয়।
এনে পৰিস্থিতিত সাধাৰণ লোকক সকাহ দিবলৈ পদক্ষেপ গ্ৰহণ কৰিছে ইণ্ডিয়ান অইলে। ঠিকনাৰ কোনো নথি অবিহনেই গ্ৰাহকসকলে ‘চোটু LPG চিলিণ্ডাৰ’ (Chhotu LPG cylinder) ক্ৰয় কৰিব পাৰিব।
গ্ৰাহকসকলে ইণ্ডিয়ান অইলৰ ডীলাৰৰ বাহিৰেও ইণ্ডিয়ান অইল ৰিটেইন আউটলেট বা স্থানীয় ছুপাৰমাৰ্কেটৰ পৰা এই ‘চোটু LPG চিলিণ্ডাৰ’ ক্ৰয় কৰিব পাৰিব।
ইয়াৰ বাবে গ্ৰাহকে কানেকশ্যনৰ ক্ষেত্ৰত কেবল নিজৰ পৰিচয়ৰ নথি দিব লাগিব। দেশৰ যিকোনো অংশৰ ডিষ্ট্ৰিবিউটৰ বা বিক্ৰী কেন্দ্ৰৰ পৰা এই চিলিণ্ডাৰ ৰিফিল কৰা হয়।
ইণ্ডেনৰ এই ‘চোটু LPG চিলিণ্ডাৰ’ সম্পৰ্কে কিছু জানিবলগীয়া কথা হ’লঃ-
*ইণ্ডিয়ান অইলে গ্ৰাহকৰ সুবিধাৰ্থে বজাৰলৈ অনা এই চিলিণ্ডাৰৰ ওজন হৈছে ৫কিলোগ্ৰাম।
* এই চিলিণ্ডাৰ কিনাৰ বাবে কোনো ঠিকনাৰ নথি দিয়াৰ প্ৰয়োজন নাই। চৰকাৰী যিকোনো পৰিচয় পত্ৰই যথেষ্ট।
* ‘চোটু LPG চিলিণ্ডাৰ’ কিনাৰ বাবে কোনো ছিকিউৰিটি ডিপ’জিট জমা দিব নালাগে।
* দেশৰ প্ৰতিখন জিলাতে ‘চোটু LPG চিলিণ্ডাৰ’পোৱা যাব। ইণ্ডিয়ান অইলৰ ডিষ্ট্ৰিবিউটৰ বা বৈধ বিক্ৰী কেন্দ্ৰৰ পৰা এই চিলিণ্ডাৰ ক্ৰয় কৰিব পাৰিব।
*১৪.২ কিলোগ্ৰাম ঘৰুৱা এলপিজি চিলিণ্ডাৰৰ ক্ষেত্ৰত চৰকাৰে দিয়া ৰাজসাহায্য এই ‘চোটু LPG চিলিণ্ডাৰ’ত পোৱা নাযাব।
