চূড়ান্ত এন আৰ চি প্ৰকাশৰ বাবে মাত্ৰ দুদিনমান বাকী থকা সময়তে অসম সন্মিলিত মহাসংঘই কয় যে ৩১ আগষ্টত প্ৰকাশ পাবলগীয়া ৰাষ্ট্ৰীয় নাগৰিকপঞ্জী (এনআৰচি)খন এখন চূড়ান্ত এন আৰ চি হ’ব নোৱাৰে।
মহাসংঘৰ কাৰ্যকৰী সভাপতি মতিউৰ ৰহমানে সাংবাদিকক কয় যে উচ্চতম ন্যায়ালয়ৰ সাংবিধানিক বিচাৰপীঠে তেওঁলোকৰ আবেদনৰ ৰায় নিদিয়ালৈকে এখন চূড়ান্ত এন আৰ চি সম্ভৱ নহয়।
বহুকেইটা জনজাতীয় তথা খিলঞ্জীয়া সংগঠনৰ এটা সন্মিলিত সংগঠন অসম সন্মিলিত মহাসংঘই বিদেশী চিনাক্তকৰণৰ বাবে নিৰ্দ্ধাৰিত তাৰিখ ১৯৭১ চনৰ ২৫ মাৰ্চৰ সাংবিধানিক বৈধতাক প্ৰত্যহ্বান জনাইছিল।
সংগঠনটোৱে এইক্ষেত্ৰত দেশৰ আন আন অংশৰ দৰে নাগৰিকত্ব নিৰ্দ্ধাৰণৰ বৰ্ষ ১৯৫১ চন কৰাৰ দাবী তুলিছিল।
মহাসংঘৰ আবেদনখন যোৱা ২০১৪ চনৰ পৰা বৰ্তমান উচ্চতম ন্যায়ালয়ৰ সাংবিধানিক বিচাৰপীঠত পৰি আছে।
‘’সাংবিধানিক বিচাৰপীঠে আমাৰ আবেদনখনৰ ওপৰত ৰায় নিদিয়ালৈকে আগষ্টত প্ৰকাশ পাবলগীয়া এন আৰ চি খন চূড়ান্ত এন আৰ চি হ’ব নোৱাৰে,’’-ৰহমানে কয়।
‘’১৯৭১ চনৰ ভিত্তিবৰ্ষই খিলঞ্জীয়া লোকৰ অধিকাৰ সুৰক্ষিত নকৰে কিয়নো পূৰ্বৰ পূব পাকিস্তান আৰু পাছৰ বাংলাদেশৰ পৰা বহু প্ৰব্ৰজনকাৰীয়ে ১৯৫১ চনৰ পৰা অসমত প্ৰৱেশ কৰিছে,’’-যুক্তি দাঙি ধৰি ৰহমানে কয়।
