NRC-ক “সৰ্বনাশৰ দলিল” আখ্যাৰে তৎক্ষণাত ইয়াৰ প্ৰকাশত বিশেষ স্থগিতাদেশ দাবী সুকুমাৰ বিশ্বাসৰ
এন আৰ চি প্ৰকাশৰ বাবে মাজত এক সপ্তাহৰো কম সময় থকা অৱস্থাত ইয়াক অসম আৰু অসমীয়াৰ “সৰ্বনাশৰ দলিল” আখ্যা দিছে সদৌ অসম বাঙালী যুব ছাত্ৰ ফেডাৰেইশ্যনৰ প্ৰাক্তন সভাপতি তথা মুখ্য উপদেষ্টা সুকুমাৰ বিশ্বাসে।
“আৰু ইয়াৰ বাবে একমাত্ৰ দায়ী ৰাজ্যিক সমন্বয়ক প্ৰতীক হাজেলা চাহাব, আছু আৰু অসম গৌৰৱ ৰঞ্জন গগৈ দেৱ”, নিজে ৰেকৰ্ডিং কৰা এটা ভিডিঅ’ত বিশ্বাসৰ মন্তব্য।
ইয়াৰ কাৰণ হ’ল এন আৰ চিত প্ৰায় ২০ লাখ বিদেশী নাগৰিকৰ নাম সোমোৱাৰ বিপৰীতে ১৫-২০ লাখ স্বদেশী লোকৰ নাম বাদ পৰিছে, এতিয়াও প্ৰকাশ নোপোৱা আৰু কোনো তথ্য ৰাজহুৱা নোহোৱা সত্ত্বেও বিশ্বাসৰ দাবী।
“নাম বাদ পৰা এই ভাৰতীয় নাগৰিকসকল হাত সাৱটি বহি নাথাকে। গতিকে ৰাজ্যৰ আইন-শৃংখলাৰ অৱনতি ঘটাটো নিশ্চিত হৈছে”, বিশ্বাসে কয়।
ৰাজ্য চৰকাৰে কেন্দ্ৰীয় চৰকাৰৰ সহযোগত বিশেষ স্থগিতাদেশ জাৰিৰে এন আৰ চিৰ প্ৰকাশ তৎক্ষণাত বন্ধ কৰি দিব লাগে বুলি কয়।
“নহ’লে অসমক ধ্বংসৰ গৰাহৰ পৰা কোনেও বচাব নোৱাৰে”, বিশ্বাসে কয়।
তেওঁ এন আৰ চিক ১৯৮৫ চনত আছুৱে অসম চুক্তি কৰি কৰা ভুলৰ সৈতে তুলনা কৰি ইয়াক একে ধৰণৰ দ্বিতীয়টো ভুল আখ্যা দিয়ে।
“এন আৰ চি যদি প্ৰকাশ হয় আৰু ইয়াক বৈধ নথি হিচাপে ধৰা হয়, তেনেহ’লে অসমত আছু আৰু ৰঞ্জন গগৈ “বদন বৰুৱা” (বদন বৰফুকন বুলি পঢ়ক) হৈ ৰ’ব”, বাঙালী যৌথ সংগ্ৰাম সমিতিৰো সভাপতি সুকুমাৰ বিশ্বাসে কয়।
এন আৰ চি যাতে প্ৰকাশ নকৰে, তাৰ বাবে উচ্চতম ন্যায়ালয়ক অনুৰোধ জনাবলৈ তেওঁ ৰাজ্যৰ সচেতন নাগৰিকসকলকো আহ্বান জনায়।