নুমলীগড় শোধনাগাৰৰ বিবেকানন্দ কেন্দ্ৰৰ চিকিৎসালয়ত ৩১ আগষ্টৰ পৰা চিকিৎসাৰ বাবে ৰোগীয়ে ব্যৱহাৰ কৰিব পৰাকৈ পাইপ লাইনেৰে অক্সিজেন আৰু অনান্য গেছ যোগান দিব পৰা এক অভিলাষী প্ৰকল্প আৰম্ভ কৰা হৈছে ৷
৩১ আগষ্টত আৰম্ভ কৰা এই প্ৰকল্পৰ দ্বাৰা চিকিৎসালয়ত থকা প্ৰতিজন ৰোগীক প্ৰয়োজনত পাইপ লাইনেৰে অক্সিজেন আৰু আনুষংগিক গেছ চিকিৎসালয়ৰ বিচনাতে প্ৰদান কৰিব পৰা হ’ব ৷
গেছ পাইপ লাইনৰ এই বিশেষ প্ৰকল্প উদ্বোধনৰ বাবে শোধনাগাৰৰ নগৰাঞ্চলত থকা বিবেকানন্দ কেন্দ্ৰ চিকিৎসালয় প্ৰাংগনত আয়োজিত উদ্বোধনী অনুষ্ঠানত চিকিৎসালয়খনৰ সমন্বয়ৰক্ষী সমিতিৰ সভাপতি ৰমেন শৰ্মা, সদস্য ডঃ চন্দন কুমাৰ শৰ্মা, নুমলীগড় শোধনাগাৰৰ মুখ্য মহা প্ৰৱন্ধক কাজল শইকীয়া আৰু বিবেশ গুপ্তা, চিকিৎসালয়খনৰ অধীক্ষক ডাঃ ৰঞ্জন কুমাৰ মহন্তৰ লগতে চিকিৎসালয় খনৰ সমুহ চিকিৎসক ,চিকিৎসা সহায়ক আৰু কৰ্মচাৰীসকল উপস্থিত থাকে ৷
নতুন দিল্লীৰ মেডিফেচ প্ৰাইভেট লিমিটেডে প্ৰতিষ্ঠাপন কৰা এই গেছ পাইপ লাইন প্ৰকল্প ফিটা কাটি আৰু নাৰিকল ভাঙি আনুষ্ঠানিকভাৱে উন্মোচন কৰে সমন্বয় সমিতিৰ সভাপতি ৰমেন শৰ্মাই ৷
উদ্বোধনী অনুষ্ঠানত উপস্থিত থাকি মুখ্য মহা প্ৰৱন্ধক কাজল শইকীয়াই কয় যে ক’ভিড অতিমাৰীৰ জটিল সময়চোৱাতেই আমি নুমলীগড় শোধনাগাৰে ইয়াৰ বিবেকানন্দ কেন্দ্ৰ চিকিৎসালয়ত পাইপেৰে অক্সিজেন আৰু আনুষংগিক গেছ যোগানৰ পৰিকল্পনা কৰিছিলো ৷ ইয়াৰে সফল ৰূপায়নৰ বাবে আমি সকলোকে ধন্যবাদ জনাইছো ৷
লগতে পঢ়ক: বিশিষ্ট সংগীত শিল্পী খগেন গগৈলৈ কণ্ঠ শিৰোমণি আৰু বিপুল চেতিয়া ফুকনলৈ কণ্ঠ সুধামৃত বঁটা ঘোষণা
চিকিৎসালয়ত পাইপ লাইন গেছ যোগান উদ্বোধন কৰি চেয়াৰমেন ৰমেন শৰ্মাই নুমলীগড় শোধনাগাৰৰ বিষয়া-কৰ্মচাৰীৰ উপৰিও শোধনাগাৰৰ দাঁতি কাষৰীয় অঞ্চলৰ জনসাধাৰণকো চিকৎসাসেৱা আগবঢ়াই মনৱতাৰ নিদৰ্শন দাঙি ধৰাৰ বাবে নুমলীগড়ৰ বিবেকানন্দ কেন্দ্ৰ চিকিৎসালয়ক ধন্যবাদ জ্ঞাপন কৰে ৷
