চুবুৰীয়া দেশ বাংলাদেশত যোৱা বছৰ দুৰ্গা পূজাৰ সংখ্যাই যি অভিলেখ গঢ়িছিল এইবাৰ পূজা মণ্ডপৰ সংখ্যাই সেই অভিলেখক চেৰাই গৈছে।
বাংলাদেশ পূজা উদযাপন পৰিষদৰ সাধাৰণ সচিব নিৰ্মল কুমাৰ চেটাৰ্জীয়ে জানিবলৈ দিয়া মতে, সমগ্ৰ দেশখনৰ এইবাৰ পূজা মণ্ডপৰ মুঠ সংখ্যা ৩১,৩৯৮টা।
যোৱাবাৰ এই সংখ্যা আছিল ৩০,৯১৫টা, যিটো পূৰ্বৰ তুলনাত এটা অভিলেখ আছিল। এইবাৰ ৪৮৩টা মণ্ডপ বাঢ়িছে, সংবাদ মাধ্যমক জনায় সা: সম্পাদক চেটাৰ্জীয়ে।
এইবাৰ ঢাকাত অনুষ্ঠিত পূজাৰ সংখ্যাও যোৱা বছৰতকৈ যথেষ্ট বেছি।
দেশখনৰ মুঠ আঠটা বিভাগ (division)ৰ ঢাকা বিভাগটোত ৭২৭১টা, চট্টগ্ৰাম বিভাগত ৪৪৫৬টা, ছিলেটত ২৫৪৫টা, খুনলাত ৪৯৩৬টা, ৰাজশ্বাহীত ৩৫১২টা, ৰংপুৰত ১৭৪১টা আৰু মৈমনসিঙত ১৬৩২টা পূজা মণ্ডপ স্থাপন কৰা হৈছে।
মণ্ডপবোৰত ভাৰতৰ দৰেই বিভিন্ন কাৰুকাৰ্য্যৰ প্ৰকাশ দেখা গৈছে, যিবোৰত বাংলাদেশৰ লগতে ভাৰতীয় সংস্কৃতিৰো সমাহাৰ ঘটিছে। সকলো মণ্ডপতে সাজসজ্জা আৰু আলপনাৰ যেন অঘোষিত প্ৰতিযোগিতা।
হিন্দুসকল নিৰ্য্যাতিত বুলি থকা তথাকথিত ধাৰণাটোৰ বিপৰীতে চিটাগঙৰ পৰা এজন অসমীয়া মূলৰ হিন্দু তিমথি অসমে নৰ্থ-ইষ্ট নাওক জনালে, “নিজৰ ধৰ্মীয় ৰীতি-নীতি পালনত কোনো অসুবিধা পোৱা নাই হিন্দু সকলে”।
“ইয়াত চব ঠিকে আছে”, চুবুৰীয়া দেশখনৰ পৰা শাৰদীয় শুভেচ্ছা জনাই তিমথিয়ে কয়।
৫ অক্টোবৰত দুৰ্গা পূজা উপলক্ষে চট্টগ্ৰামৰ আলকৰণ ৱাৰ্ডত কেন্দ্ৰীয় ছাত্ৰ লীগৰ প্ৰাক্তন সহ-সম্পাদক ইয়াছিৰ আৰাফতে বিভিন্নটা পূজা মণ্ডপত বস্ত্ৰ বিতৰণ কৰে।
প্ৰায় ৯০ শতাংশ মুছলমান থকা দেশখনৰ কোনো অংশৰ পৰা কোনো অপ্ৰীতিকৰ ঘটনা ঘটাৰ বাতৰি অহা নাই।
