অমিক্ৰণতকৈও ভয়াৱহ অ’ মিত্ৰঁ! বিশ্বজুৰি নতুনকৈ প্ৰাদুৰ্ভাৱ ঘটা ক’ভিডৰ নতুন এই প্ৰজাতিটোতকৈ অধিক ধ্বংসকাৰী এই অ’ মিত্ৰঁ। এই ভাষ্য প্ৰদান কৰিছে কংগ্ৰেছ সাংসদ শশী থাৰুৰে।
থাৰুৰে টুইটাৰযোগে লিখিছে যে প্ৰধানমন্ত্ৰী নৰেন্দ্ৰ মোদীয়ে ৰাজহুৱা অনুষ্ঠানসমূহত চিঞৰা “অ’ মিত্ৰঁ’’ সম্বোধনটো অমিক্ৰণতকৈও ভয়াৱহ। থাৰুৰে এইদৰে লিখে যে মোদীৰ এই ‘অ’ মিত্ৰঁ’ই দেশৰ সংবিধান অৱমাননা কৰা ঘটনাসমূহক উদ্গণি যোগাইছে।
অ’ মিত্ৰঁৰ ফলাফল হৈছে সাম্প্ৰদায়িক বিভাজন, ঘৃণাৰ প্ৰচাৰ আৰু গণতান্ত্ৰিক প্ৰমূল্যবোধৰ অৱক্ষয়।
ৰাষ্ট্ৰপতি ৰামনাথ কোৱিন্দে শেহতীয়াকৈ যুটীয়া সংসদত এটা ভাষণ আগবঢ়াইছে। ভাষণটোত তেওঁ মোদী চৰকাৰৰ সফলতাসমূহ বখানিছে। তদুপৰি মোদী চৰকাৰে সংবিধানৰ ৰূপকাৰ আম্বেদকাৰৰ আদৰ্শমতে চলা বুলিও ৰাষ্ট্ৰপতিগৰাকীয়ে মন্তব্য কৰে।
তাৰপাছতে কংগ্ৰেছী সাংসদ শশী থাৰুৰে এইদৰে টুইট কৰিছে। প্রধানমন্ত্ৰী মোদীয়ে সম্বোধন কৰা ‘অ’ মিত্ৰঁ’ক অমিক্ৰণৰ স’তে তুলনা কৰাক লৈ সম্প্ৰতি তীব্ৰ হাস্যৰসৰ সৃষ্টি হৈছে।
