অইল ইন্দিয়াৰ তেল পৰিবাহী পাইপৰ পৰা চুৰিৰ ঘটনা অসমত সৰ্বজনবিদিত। তেল চুৰি কৰি কোটিপতি হোৱা বুলিও দুই-এজনৰ বিষয়ে সংবাদ মাধ্যমে বহু সময়ত বাতৰি প্ৰচাৰ কৰিছে।
কিন্তু এইবাৰ তেলচোৰক সিন্ধি চাই সোপা দিয়াৰ ব্যৱস্থা কৰিছে অইল ইন্দিয়া লিমিতেদে।
ব্যাপক তেল চুৰিত জৰ্জৰিত অইলে এই ঘটনা ৰোধৰ বাবে অসমৰ লগতে বাকী অঞ্চলটো কৃত্ৰিম বুদ্ধিমত্তা (আৰ্তিফিশ্বেল ইন্তেলিজেন্স/ Artificial Intelligence)ৰ সহায় ল’বলৈ আগবাঢ়িছে।
এই সন্দৰ্ভত যোৱা ২৭ মে’ত সংশ্লিষ্ট কাম্পেনিসমূহৰ পৰা অইলে নিবিদা আহ্বান কৰিছে। সংগ্ৰহ কেন্দ্ৰসমূহলৈ পৰিবাহিত তেল আৰু গেছৰ বাস্তৱ সময় (real time)ৰ তথ্য সংগ্ৰহ কৰাৰ বাবে মূল নাদ (well-head)ত চেন্সৰ (sensor) সংস্থাপনৰ কামৰ বাবে নিবিদা (expression of interest/ EOI) আহ্বান কৰা হৈছে।
চলিত মাহৰ ২১ তাৰিখ নিবিদা দাখিলৰ অন্তিম দিন।
এই ‘দিজিতেল অইলফিল্দ তে’কনলজি’ পৰীক্ষা কৰাৰ বাবে অইলে এক ধ্বজাবাহী প্ৰকল্প (pilot project) হাতত লৈছে। হেবেদা তৈলক্ষেত্ৰত এই প্ৰকল্পটো সম্পাদন কৰা হ’ব।
লগতে মাকুম আৰু হাপজান তৈলক্ষেত্ৰতো এই প্ৰকল্প ৰূপায়ণ কৰা হ’ব।
“হেবেদাৰ পৰা এই কাম সম্ভৱ হ’ব কাৰণ ইয়াত এটা জি চি এচ (gas collecting station) আছে,” নৰ্থ-ইষ্ট নাওক জনায় অইলৰ এজন শীৰ্ষ বিষয়াই।
নাম প্ৰকাশ নকৰাৰ চৰ্তত বিষয়াগৰাকীয়ে লগতে জনায়, “ই ইনস্তলে’চন মেনেজাৰক বাস্তৱ সময়ৰ নিৰীক্ষণত সহায় কৰিব। এবাৰ নিৰীক্ষণ আৰম্ভ হ’লে যিকোনো বিচ্যুতি তৎক্ষণাত ধৰা পেলাব যাব।”
এই নিৰীক্ষণ মানুহে কৰা সম্ভৱ নহয় বুলি জনাই বিষয়াজনে লগতে কয় যে প্ৰযুক্তিৰ ব্যৱহাৰৰ ফলত উৎপাদন সম্পৰ্কীয় তথ্যৰ সঠিক ব্যৱহাৰো সম্ভৱ হ’ব। ফলত সামগ্ৰিক ৰিজাৰ্ভাৰ ব্যৱস্থাপনাৰ লগতে সন্ধান আৰু উৎপাদনৰ ক্ষেত্ৰতো সৰ্বোত্তম সিদ্ধান্ত গ্ৰহণ সম্ভৱ হ’ব।
২০১৮ চনত অইলৰ তথ্য-প্ৰযুক্তি মুৰব্বী আশিস বাহুখান্দিক কাৰ্য্যবাহী সঞ্চালক (তথ্য-প্ৰযুক্তি)ৰ পৰা কাৰ্য্যবাহী সঞ্চালক (ইনফ’ কম আৰু দিজিতেল অইলফিল্দ) পদলৈ বদলিৰ পৰাই এই দিজিতেল অইলফিল্দ তে’কনলজিৰ ব্যৱহাৰ আৰম্ভ হৈছে।
দিজিতেল অইলফিল্দ তে’কনলজিত বাহুখান্দি প্ৰচুৰ অভিজ্ঞতাসম্পন্ন আৰু উদ্ভাৱনীমুখী।
